Ёнғин сабаб хусусий уйлардан бирининг гаражида ёниб кетган қимматбаҳо автомобиллар коллекцияси сотувга қўйилди, деб хабар беради CARakoom.
Суратларнинг бирида 1970 йилда ишлаб чиқарилган Aston Martin V8 Vantage тасвирланган. Унинг кузовидан деярли ҳеч нарса омон қолмаган, фақатгина кегайли классик ғилдирак дискалари қандайдир усул билан ёнғинга «бардош» берган.
Шунингдек, суратларда ачинарли аҳволга келиб қолган Porsche 911’ни ҳам учратиш мумкин. Кадрнинг ўнг томонида бошқа бир автомобиль ҳам ёниб кетгани кўзга ташланади. Ушбу битта кадрнинг ўзида фожианинг кўлами ҳақида тасаввур пайдо бўлади.
Навбатдаги суратларнинг бирида ноёб Porsche 911 Turbo Targa’ни учратиш мумкин, у ҳам ёнғиндан жабр кўрган, бироқ қолган автомобиллардан кўра камроқ.
Singer Vehicle Design тюнингига эга Porsche 911 CARRERA 2’дан эса деярли ҳеч нима қолмаган. Компания 964 шассили 911’лардан биринчи классга оид рестомоделларни тайёрлайди. Уларни яратишга ойлаб ва йиллаб вақт кетади ҳамда уларнинг нархи 300 минг доллар атрофида. Автомобилнинг ёниб кетган кузови эса 2100 доллар нархида сотувга қўйилган.
2000 йилда ишлаб чиқарилган BMW Z8 эса 160 минг доллар бўлиб, ҳозирда у Copart аукциони орқали 275 долларга сотилмоқда.
Эслатиб ўтамиз, шу йилнинг апрелида Флорида штатининг Форт Майерс аэропорти яқинидаги каршеринг машиналар (қисқа вақтга ижарага бериладиган авто) жойлашган автопаркда чиққан ёнғин сабаб 3,5 мингта автомобиль ёниб кетганди.