Yevropa futbol assotsiatsiyalari ittifoqi (UEFA) prezidenti Mishel Platini Xalqaro futbol federatsiyasi (FIFA) prezidenti Yozef Blatterdan go‘yoki 1999—2002-yillarda FIFAda ishlagani uchun 2 million Shveysariya frankini og‘zaki kelishuv asosida olgan. Ishni muayyan mablag‘ evaziga bajarish haqida yozma shartnoma bo‘lmagan. Bu haqda Britaniyaning The Guardian nashri huquqni muhofaza qilish organlaridagi manbasiga tayanib xabar bermoqda, deb yozadi “Vedomosti”.
Blatter va Platini tergovchilarga ular o‘rtasidagi bitim og‘zaki bo‘lganini ma’lum qilgan. Bundan tashqari, Shveysariya qonunchiligiga ko‘ra, ishchi to‘lovni olish uchun besh yil ichida da’vo qilishi mumkin, biroq mablag‘ 2011-yildagina ko‘chirilgan. Aynan shu ikki fakt jinoyat ishi qo‘zg‘ash uchun sabab bo‘lgan.
Eslatib o‘tamiz, Shveysariya 24-sentabr kuni FIFA rahbari Yozef Blatterga nisbatan jinoiy tergov boshlagan edi. Uni mas’uliyatsizlik va mol-mulkni noqonuniy o‘zlashtirib olishda ayblashmoqda. Blatter federatsiya uchun foydasiz bo‘lgan teletranslyatsiya shartnomasini tuzishda gumon qilinmoqda. Shartnoma 2005-yilda KONKAKAFning o‘sha paytdagi rahbari Jek Uorner bilan imzolangan. Bundan tashqari, FIFA prezidenti UEFA rahbari Mishel Platiniga noqonuniy pul o‘tkazganlikda shubha qilinmoqda. Bunda gap ikki million frank haqida bormoqda. Ushbu summani Blatter 2011-yilda to‘lagan.
UEFA prezidenti Mishel Platiniga pul o‘tkazish haqida gapirar ekan, Blatter uning FIFA bilan 1998-yildan buyon prezident maslahatchisi sifatida hamkorlik qilib kelishini, to‘lov esa uning ishi uchun berilgan qonuniy kompensatsiya ekanligini qayd etgan.
8-oktabr, payshanba kuni xalqaro futbol federatsiyasi axloq qo‘mitasi Blatter, UEFA prezidenti Mishel Platini va FIFA bosh kotibi Jerom Valkeni lavozimlari hamda futbolga oid barcha faoliyatdan 90 kun muddatga chetlatdi. Blatter va Platini mazkur qaror yuzasidan appelyatsiya berdi.
Izoh (0)