Qatar poytaxti Doha shahrida yakuniga yetib borayotgan boks bo‘yicha kattalar o‘rtasidagi jahon chempionatida yarim final uchrashuvlari davom etyapti. Kecha, 11-oktabr kuni yarim finalda ringga ko‘tarilgan uch nafar o‘zbekistonlik bokschilarning barchasi final chiptasini qo‘lga kiritdi, deb xabar beradi “Olamsport”.
Dastlab, Murodjon Ahmadaliyev (-56 kg) hindistonlik raqibi Shiva Tapani 3:0 (29:28, 29:28, 29:28) hisobida taslim etdi. Uning finaldagi raqibi Maykl Konlan bo‘ladi. Irlandiyalik bu bokschi yarim finalda belaruslik Dmitriy Asanaudan 3:0 hisobida ustun keldi.
64 kg vazn toifasida ishtirok etayotgan Fazliddin G‘oipnazarov tailandlik azaliy raqibi Vuttichay Masukni 3:0 (30:27, 30:27, 30:27) hisobida yengdi. Fazliddin final jangida rossiyalik Vitaliy Dunaysevga qarshi ringga ko‘tariladi. Dunaysev yarim finalda kubalik Toledo Lopesni 2:1 hisobida taslim etdi.
75 kg vazn toifasida amaldagi Osiyo chempioni Bektemir Meliqo‘ziyev ham final yo‘llanmasini qo‘lga kiritdi. 19 yoshli Bektemir yarim finalda irlandiyalik Maykl Oreylini 2:1 hisobida mag‘lubiyatga uchratdi. Uning finaldagi raqibi kubalik Arlen Lopes bo‘ladi. Lopes yarim finalda misrlik Xosam Abdinni 3:0 hisobida yengdi.
Shu tariqa, birinchi kungi yarim final janglaridan so‘ng o‘zbekistonlik 3 nafar charm qo‘lqop ustasi final chiptasi va eng muhimi, Rio—2016 Olimpiadasi yo‘llanmasini naqd qildi. Bugun, 12-oktabr kuni O‘zbekiston terma jamoasining yana 3 nafar bokschisi – Elnur Abduraimov (60 kg), Elshod Rasulov (81 kg) hamda Bahodir Jalolov (+91) final yo‘llanmasi uchun ringga ko‘tariladi.
Izoh (0)