Shimoliy Koreya “yangicha shakldagi” yadro sinovlari o‘tkazishi mumkinligini ma’lum qildi

Agar rasmiy Vashington Shimoliy Koreyadagi hozirgi tuzumni ag‘darishga harakat qilishda davom etaversa, KXDRning yangi yadro sinovlari o‘tkazishdan boshqa iloji qolmaydi. Nyu-Yorkda bo‘lib o‘tgan matbuot anjumanida KXDRning BMTdagi doimiy vakili o‘rinbosari Ri Don Il shunday deya bayonot berdi. Bu to‘g‘rida Janubiy Koreyaning davlat teleradiokompaniyasi – KBS’ning 5-apreldagi xabariga tayanib “ITAR-TASS” ma’lumot bermoqda.

Bayonotda sinovlar “yangicha shaklda” o‘tkazilishi ma’lum qilingan, Ri Don Il AQSh ma’muriyatiga buning aynan qanday shakldagi sinov bo‘lishini ko‘rish uchun kutib turishni maslahat bergan.

Ri Don Il “Shimoliy Koreyani siyosiy chetlashtirish va iqtisodiy yakkalashga qaratilgan Amerika siyosati”ni tanqid qilgan. Mamlakatdagi kommunistik rejim inson huquqlarini buzayotganligi borasidagi ayblovlarga javoban u KXDRda “dunyodagi eng yaxshi jamiyat tizimi” qurilganligini bayon etgan.

BMT Xavfsizlik kengashi rezolyutsiyalari Koreya Xalq Demokratik Respublikasiga yadro texnologiyalari bilan bog‘liq har qanday faoliyat olib borishni taqiqlab qo‘ygan bo‘lsa-da, 2006-yildan buyon u uchta yadro sinovi o‘tkazgan. Joriy yilning mart oyi oxirida Pxenyan yana “yangi turdagi” yadro sinovlari o‘tkazishi mumkinligini ma’lum qilgan.

Yadro dasturlaridan tashqari, Shimoliy Koreya 2014-yilning boshidan buyon oltmishdan ortiq turli raketalar uchirgan. Shimoldagi qo‘shnisi tomonidan bo‘ladigan xavfga qarshi tura olish uchun Janubiy Koreya ham yaqinda KXDRdagi har qanday nishonni ura oluvchi raketalarni sinovdan o‘tkazgan. Bundan tashqari, Pxenyan raketalarni asosan Yapon dengizi tomon uchirayotganligini inobatga olib, Yaponiya mudofaa vaziri ham Shimoliy Koreya raketalarini urib tushirishni buyurgan.