Qirg‘iziston sobiq prezidenti Qurmanbek Bakiyev Buyuk Britaniya fuqarosi Shon Deyliga suiqasd tashkil qilishda ayblanib 25 yilga ozodlikdan mahkum qilindi. Bu haqda “ITAR-TASS” xabar berdi.
Shuningdek, sobiq prezidentning ukasi Jonibek Bakiyevga bu ish bo‘yicha mol-mulki musodara qilingan holda umrbod qamoq jazosi tayinlandi. Sobiq Davlat rahbarining katta o‘g‘li Marat Bakiyev 20 yillik koloniyaga, kichik o‘g‘li Maksim Bakiyev umrbod qamoq jazosiga mahkum etildi. Har ikkisining ham mol-mulki musodara qilindi.
Tergovlar natijasida 2005-yilda Bakiyevlar oilasi Qirg‘izistonning Talas viloyatidagi Jeruy oltin konini qo‘lga kiritishga qaror qilgani ma’lum bo‘ldi. O‘sha vaqtda kon Oxus Gold kompaniyasiga tegishli bo‘lgan. Uning rahbari — Britaniya fuqarosi Deylini chetlatish maqsadida Bakiyevlar oilasi unga 5,6 kalibrli to‘pponchadan olti marta o‘q uzishgan. Biroq vaqtida ko‘rsatilgan tibbiy yordam tufayli xorij fuqarosi tirik qolgan.
Qurmanbek Bakiyev 2005–2010-yillarda prezidentlik qilgan. 2010-yil aprel voqealarida qo‘zg‘olonchilar va hukumat kuchlari o‘rtasidagi to‘qnashuvlarda 70 dan ortiq kishi halok bo‘lgan. To‘ntarishdan keyin prezident Aleksandr Lukashenko taklifi bilan Belorussiyaga ketgan. Qirg‘iziston hukumati tepasiga kelgan raqiblari Bakiyevni topshirishni talab etishgan, ammo Belorussiya uni Qirg‘izistonga topshirishdan bosh tortgan.
Izoh (0)