Рақобат қўмитаси Magic City’нинг инвестор компаниясидаги улушни ўтказишни маъқуллади. Бу ҳақда қўмита ахборот хизмати хабар берди.
Маълум қилинишича, “Хонадон таомлар” МЧЖнинг Stargate Systems МЧЖнинг 86,2 фоиз улушларини олиш бўйича аризаси кўриб чиқилган.
Қўмитанинг Махсус комиссияси томонидан ўтказилган таҳлил натижаларига кўра, мазкур битимлар бозорда рақобатга таъсир кўрсатмаслиги бўйича хулосага келинган ва аризани қаноатлантириш ҳамда битимларга розилик бериш ҳақида қарор қабул қилинган.
Статистика агентлиги маълумотларига кўра, Stargate Systems МЧЖ кўнгилочар ва дам олиш боғлари фаолияти билан шуғулланувчи ташкилот ҳисобланади. Компаниянинг устав капитали 426,94 млрд сўмни ташкил этиб, айни пайтда унинг 86,2 фоизи 2019 йилда ташкил этилган “Таshkent Aquarium”га тегишли. Қолган 13,8 фоизига президентнинг собиқ маслаҳатчиси Абдужаббор Абдувоҳитовнинг (Жаҳонгир Ортиқхўжаевнинг қудаси) ўғли Алишер Абдужабарович Абдувоҳитов эгалик қилади. У бир вақтнинг ўзида устав фонди 57,04 млрд сўмга тенг бўлган “Ташкент Aquaриум”нинг ягона мулкдори ҳисобланади.
2023 йилнинг 27 декабрь куни ташкил этилган “Хонадон таомлари” ресторан ва озиқ-овқат маҳсулотлари етказиш хизматларини кўрсатиш соҳасида фаолият юритади. 50 млн сўмлик устав капиталига эга компаниянинг ягона таъсисчиси Муҳамадиев Фирдавс Файзуллоевич, раҳбари эса Абдумажидов Бекзод Музаффаровчи ҳисобланади.
Эътиборлиси, юқоридаги барча компаниялар Чилонзор тумани, “Бешёғоч” МФЙ, Олмазор даҳаси, 183-А уйда жойлашган.
Бундан кўриниб турибдики, Magic Cityънинг мулкдори фақат ҳужжатлардагина ўзгарган бўлиши мумкин.
Magic City истироҳат боғи Миллий боғ ҳудудида 2021 йил июнь ойида очилган. Лойиҳа инвестори Akfa таркибига кирувчи Stargate Systems бўлган. Компания Миллий боғнинг 20,79 гектар бўлган боғ ҳудудини 49 йилга ижарага олган.
Ўтган йилнинг бошида Тошкент шаҳрининг собиқ ҳокими ва тадбиркор Жаҳонгир Ортиқхўжаев ўзининг 7 та компанияси, жумладан, Magic City парки ва Mediapark техника дўконлари тармоғини сотганини билдирганди.
Рақобат қўмитаси хабари юзасидан иқтисодчи Отабек Бакиров 8 йил давомида учинчи марта Stargate Systems МЧЖнинг улушдори ўзгараётгани юзасидан ўз муносабатини билдириб, саволларни ўртага ташлади.
“Албатта, бу битим ортидан Magic City операторининг ҳақиқий бенефициарлари яна ўзгармоқдами ёки йўқми, чуқурроқ ўрганишсиз бир нима дейиш қийин.
Лекин аниқки, 8 йил аввал давлатдан Миллий боғнинг қарийб 21 гектарини олиб эгаллаган ва қатор мажбуриятлар олган инвестор энди бутунлай бошқа. Де юре ва де-факто бошқа инвестор. Биринчи “инвестор” отнинг устида бўлиб улушини сотди, кетди, кейин иккинчиси келди, энди учинчиси.
Табиийки, савол туғилади, давлат билан хусусий шериклик ёки бошқа мақомда битим тузилганда битим тузган субъектнинг бенефициари, акциядори, улушдори ўзгармаслиги ёки давлатнинг розилиги қоидаси бўлиши керак эмасми?
Узоққа бормайлик, оддий кредит ёки қарз ажратилаётганда ҳам қарздорнинг таъсисчилари ёки акциядорларни кредиторнинг розилигисиз ўзгартирилмаслиги талаби темир қоида ҳисобланади.
Ўзбекистонда “хусусийлаштириш”дан тортиб “давлат хусусий шериклик” дейилган янги кўзбўямачиликларгача триллионлаб қийматдаги активлар билан битим тузилаётганда эса давлатнинг, демакки, халқнинг оддий манфаатлари мантиғи унутиб қолдирилади.
Ҳеч бўлмаганда, таъсисчи, акциядор ўзгариши билан аввалбошда келишилган имтиёз ва преференсиялар бекор бўлиши ёки янги музокаралар асосида тўловлар кўриб чиқилиши тамойиллари амал қилмайди.
Рақобат қўмитаси шунақа “қўшилиш ва сотилиш” битимларига рухсат беришда, вақти-вақти билан шу ҳимоя мантиғини ёдга солиб турса бўларди” дейди иқтисодчи.
Изоҳ (0)