Шайхонтоҳур туманидаги умумтаълим мактабларидан бирининг 2-синфида таҳсил олувчи ўқувчиларнинг ота-оналари 1 октябрь — Ўқитувчи ва мураббийлар куни муносабати билан миллионлаб пул йиғмоқда. Бу ҳақда “Дарё”га билдирган мурожаатчиларга кўра, ушбу синфда таҳсил олувчи ота-оналар ташаббуси билан ҳар байрамда пул йиғиш одат қилинган.
“Дарё”га келиб тушган аудиоёзувлардан англашилишича, ушбу мактабда (мактаб рақами таҳририятга маълум, бироқ мурожаатчининг истагига кўра сир сақланмоқда) ўқитувчининг 1 октябрда олган совғаси ёки пулининг кўплигига қараб рейтингда қайси ўринда туриши таҳлил қилинади.
Олдинги сафар ҳам (2023 йилнинг 1 октябрь санаси назарда тутилмоқда, таҳририят изоҳи) жуда кам пул берганмиз, анча орқадамиз. У ерда сенга неча пул беришди, сенга қанча беришди, деган муҳокама бўлади-да. Тўғри, Зилола айтмайди, ўзи билиб-билиб ишини қилар, лекин уялади. Барибир солиштирилади, дейди гуруҳда оналарни пул беришга ундаган фуқаро.
Кўпчиликни ўқитувчи учун пул йиғишга ундаган она 2-синф ўқитувчисига 500 минг сўм йиғилишини уятли ҳолат дейди.
Катта синфда ўқийдиган болаларим учун камида 100 минг сўмдан, доллар демайман-у, сўмда йиғамиз. Миллиондан ошади-да. Буларда эса 500 минг сўм йиғилди энди, дейди фарзанди 2-синфда таҳсил олувчи ўқувчи қизнинг онаси.
Таҳририятга аудиоёзуви юборилган онанинг айтишича, шу мактабнинг 11-синфида ўқийдиган фарзандининг ўқитувчисига айни кунга қадар 1 миллион сўмдан ортиқ пул йиғилган.
Биз ҳам ҳаракат қилайлик, ҳеч бўлмаса 20 киши берсин. 1 миллион бўлсин, шундоқ конвертга солиб бераман-да. Гул ёки шоколад қилиб ўтирмайман, ўзига пулни бераман, керакли нарса олади, дейди байрам учун ота-оналардан пул йиғишни одат қилган “кассир она”.
Шу ўринда суҳбатга қўшилган оналардан бири Сурайё исмли онага мурожаат қилиб, шоколадга пул кетказмасликни, пулнинг ўзини беришни маслаҳат бериб, “Феруза опам тўй қиладиган, пулини берсак, кам-кўстига ишлатар”, дейди.
Ўқитувчининг касб байрами учун оналардан пул йиғаётган “кассир она” аёлларни эрини алдаб, пул олишга ундайди.
Бермаганлар, пулини беринглар, ҳаракат қилинглар, эрингларга уни оламан, буни оламан, деб олволинглар. 50 минг сўм ҳозир пулмас-да. Бир хилларга пулдир, аммо бизга пулмас-да, дейди “кассир она”.
Аудиоёзувда овози янграган онанинг айтишича, Шайхонтоҳур туманидаги 180-мактабда бошланғич синф ўқувчиларидан ўқитувчилар байрами учун 150-200 минг сўмдан пул йиғилмоқда.
Мактаб ўқитувчилари учун пул йиғиш масаласига қаршилигини билдирган оналардан бири Гулнора Алимова бошланғич синфларда ташкил этилган ота-оналар қўмитасининг шундай пайтда ташаббускор бўлиб қолишини айтиб, бундай ташаббускорликни қораламоқда.
Ота-оналар қўмитасининг фаоллиги фақат шу байрамда сезилса керак, ҳойнаҳой, нега сифатли таълим борасида гап кетганда ҳам шунақа ташаббускорлик бўлмайди уларда, шуниси қизиқ. Бундай ҳолат менинг фарзандларим ўқиётган мактабларда ҳам сезилмоқда. Охирги уч-тўрт кунда ота-оналар қўмитаси пул йиғишга шунчалик киришиб кетишганки, улар Ўзбекистон қонунчилигини эсдан чиқариб, ўзбошимчалик қилмоқда. Ота-оналардан пул йиғиб, уни худдики ўзи бераётгандек тутаётган оналар бу орқали фарзандини ўқитувчига яқинлаштиришни, ўқитувчини шу йўл орқали муттаҳам қилиб, фарзандининг айбларига кўз юмишга ундаётгандек. Бу бизга нима беради? Сифатсиз таълим, қолоқ ўқувчи ва тамагир ўқитувчиларни кўпайтиради, дейди у.
“Дарё” журналисти билан суҳбатда бўлган Шайхонтоҳур туман мактабгача ва мактаб таълими бўлими мудири ўтган шанба ва душанба кунлари мактабларда ўқитувчилар байрамига пул йиғиш тақиқланганини эслатганини маълум қилди.
Байрамга пул йиғиб ўқитувчига қимматбаҳо совға, қанақадир тақинчоқлар олишни тақиқлаганмиз. Ҳар бир мактабда кузатув кенгашлари ҳам иш бошлаган бўлиб, бунга қарши курашяпмиз, дейди бўлим мудири.
Изоҳ (0)