Ўзбекистонда 2025 йил 1 июлдан бошлаб дарахт эккан камбағал фуқароларга субсидия бериш йўлга қўйилади. Бу ҳақда “2025 йилда аҳоли бандлигини таъминлаш ва камбағалликни қисқартириш чора-тадбирлари тўғрисида”ги президент қарорида белгиланди.
Ҳужжатга кўра, “Экофаол фуқаро” платформасига дарахт экканлиги тўғрисида маълумотлар киритган камбағал фуқароларга ўрмон фонди ерларида экилган ҳар 100 та дарахт учун БҲМнинг бир баравари (375 минг сўм) миқдорида субсидия ажратиш тартиби жорий этилади. Бунда субсидия йилда иккига бўлиб (кўчатлар экилган вақтда ҳамда уларнинг парвариш давридан кейин) тенг улушларда тўланади.
2025 йилда камбағал оила аъзоларини жалб этган ҳолда 20 минг гектар ўрмон фонди ерларида саноатбоп, манзарали ва мевали дарахт турларидан иборат ўрмонлар барпо этиш, кўчатхоналар ташкил этиш ва доривор ўсимликлар етиштириш лойиҳалари амалга оширилади. Жами 100 гектар ер участкаларида бруссонетия дарахтини етиштириш бўйича пилот лойиҳалар амалга оширилади.
2025 йил 1 апрелдан 2028 йил 1 январга қадар янги ташкил этиладиган қишлоқ хўжалиги ва доривор ўсимликларини етиштириш ва қайта ишлаш кооперативлари учун ижтимоий солиқ ҳамда уларга ишга қабул қилинган жисмоний шахслардан олинадиган даромад солиғи ставкалари 1 фоиз этиб белгиланади.
Камбағал оилалар реестрига киритилган оилалар аъзоларига қишлоқ хўжалиги кооперативлари устав фондига улуш сифатида киритиш учун Камбағалликни қисқартириш давлат мақсадли жамғармаси ҳисобидан БҲМнинг 10 бараваригача (3 млн 750 минг) миқдорида субсидиялар ажратилади.
Изоҳ (0)