Ўзбекистон Божхона қўмитаси мобил қурилмаларни мамлакатга олиб киришда божхона декларациясини тўлдириш талаб этилишини эслатди.
“Курбанофф.нет” Telegram канали телефоннинг IMEI кодини рўйхатдан ўтказишда аввалгидек хорижга боришнинг ўзи етарли эмаслигини, мобил қурилмани импорт қилишда декларация қилиш кераклигини ёзди.
“Сайтда рўйхатдан ўтишда божхона базасидан маълумотлар қидирилади. Агар базада маълумот бўлмаса, у ҳолда телефон божхона қийматининг 30 фоизи миқдорида бож тўлаш керак бўлади”, деди канал муаллифи.
Божхона қўмитаси берган маълумотга кўра, агар фуқаро Ўзбекистонга самолётда кириб келаётган бўлса 2 донагача, агар поездда ёки автотранспорт воситасида ёки пиёда кириб келаётган бўлса ҳар олти ойда бир маротаба 1 дона телефонни олиб кириши мумкин.
Қандай олиб кирилишидан қатъий назар олиб кириладиган телефон божхона декларациясида кўрсатилиши шарт. Бу телефоннинг UzIMEI тизимидан рўйхатдан ўтказишда керак бўлади. Агар декларация тўлдирилмаса, қурилмани UzIMEI тизимида рўйхатга олиш учун телефон қийматининг 30 фоизи миқдорида бож тўлаш талаб қилинади.
Самолётда олиб келинганда бу телефонларнинг жами нархи 2000 доллардан, поездда — 1000 доллардан, автотранспортда ёки пиёда олиб келинганда — 300 доллардан ошмаслиги керак. Чекланган нормалардан ошса, қийматнинг ортиқча қисмига 30 фоиз бож ундирилади.
“Агар телефонларни қўлдан, турли савдо расталаридан ёки онлайн дўконлардан харид қилсангиз, у ҳолда уларнинг UzIMEI тизимидан рўйхатдан ўтганини албатта текширинг. Агар телефон тизимда рўйхатдан ўтмаган бўлса, у ҳолда божхона тўловларини ўзингиз тўлашингизга тўғри келади”, дейилади қўмита хабарида.
“Ўзбекистон телекоммуникация тармоқларини бошқариш республика маркази” ДУК ҳам Ўзбекистонга янги мобил қурилмалар олиб киришда божхона декларациясини тўлдириш мажбурийлигини билдирди. Таъкидланишича, янги талаб 2024 йил бошида жорий этилди. Божхона қўмитаси UzIMEI тизими оператори билан биргаликда октябрь ойида тизимларнинг маълумот алмашинувини якунлади.
2024 йил 28 январдан бошлаб ҳукуматнинг 2023 йил 26 октябрдаги “Ўзбекистон Республикаси ҳудудида фойдаланилаётган, сотиш ёки шахсий фойдаланиш учун олиб кириладиган мобил қурилмаларни рўйхатга олиш тартиби янада такомиллаштирилиши муносабати билан Ўзбекистон Республикаси ҳукуматининг айрим қарорларига ўзгартириш ва қўшимчалар киритиш тўғрисида”ги қарори кучга кирган. Унда жисмоний шахслар томонидан телефонлар олиб кирилганда, божхона тўловларидан озод қилинадиган товарларни олиб киришнинг чекланган меъёрларидан қатъи назар, декларация тўлдирилиши шартлиги белгиланган.
Изоҳ (1)
Ajoyib