АҚШ президенти Дональд Трамп туркиялик ҳамкасби Ражаб Тоййиб Эрдўғонга мурожаат қилиб, Украина масаласида воситачилик қилишни сўради. Эрдўғон эса АҚШдан Ғазо секторида отишмани тўхтатишда кўмаклашишни илтимос қилди. Бу ҳақда “Hürriyet” газетаси хабар бермоқда.
Таъкидланишича, Эрдўғон ҳам Россия президенти Владимир Путин ҳамда украиналик ҳамкасби Владимир Зеленский билан ҳам музокаралар олиб бориш имкониятига эга.
“Агар Украина Буюк Британия ва АҚШ босими остида музокаралар жараёнини тарк этмаганида, Туркия дастлабки уч ой ичида тинчликка эришган бўларди”, дея қайд этилади мақолада.
Газетанинг маълум қилишича, Туркия раҳбари Трампнинг таклифини ижобий қабул қилган.
Март ойида Эрдўғон АҚШ президенти билан телефон орқали суҳбатда унинг Украинадаги можарони ҳал этиш бўйича саъй-ҳаракатларини қўллаб-қувватлаши ҳақида хабар берилганди. Ўшанда Туркия президенти дунёдаги воқеалар Анқара ва Вашингтон ўртасида жадал маслаҳатлашувлар ўтказиш заруриятини юзага келтирганини таъкидлаганди.
Икки мамлакат раҳбарлари 5 май куни ҳам телефон орқали мулоқот қилиб, Украинадаги вазиятни тартибга солиш, Эрон билан музокаралар ва Ғазо секторидаги вазиятни муҳокама қилди.
АҚШ президенти Дональд Трамп ўзининг Truth Social ижтимоий тармоғидаги саҳифасида суҳбатни жуда яхши ва самарали деб баҳолаган ва Россия ва Украина ўртасидаги беҳуда, аммо ҳалокатли урушни тўхтатиш бўйича Эрдўғон билан ҳамкорлик қилишни интиқлик билан кутаётганини билдирган.
Изоҳ (0)