Google корпорацияси ядро энергетикаси лойиҳаларини ишлаб чиқувчи Elementl Power атом стартапи билан ҳамкорлик шартномасини имзолади. Бу ҳақда Google корпорацияси сайти маълум қилди.
Таъкидланишича, келишув 2035 йилгача ишга туширилиши мўлжалланган умумий қуввати 1 800 МВт бўлган учта янги атом электр станциясига сармоя киритишни назарда тутади. Бироқ қурилишнинг аниқ технологиялари, муддатлари ва жойлашуви ҳали ошкор қилинмаган.
Янги станцияларнинг эълон қилинган қуввати анъанавий АЭСларга нисбатан анча паст: масалан, 2023 йилда ишга туширилган Жоржия штатидаги Vogtlстанцияси умумий қуввати 4 500 МВт бўлган тўртта реакторга эга. Шу билан бирга, McKinsey маълумотларига кўра, маълумот марказларининг энергияга бўлган талаби асосан сунъий интеллект технологияларининг ривожланиши туфайли 2015 йилдаги 30 МВт дан 2024 йилда 200 МВт гача кўтарилган.
2022 йилда ташкил этилган Elementl Power ўзини “технологик жиҳатдан бетараф” ишлаб чиқувчи сифатида тақдим этиб, ҳозирча бирорта лойиҳани амалга оширмаган. Компания раҳбарияти, жумладан, бош директор Кристофер Колберт (NuScale Power эксперти) кичик модулли реакторларга (SMR) эътибор қаратмоқда.
Бу Google’нинг сўнгги ярим йил ичида атом соҳасидаги иккинчи келишуви ҳисобланади. 2024 йил октябрь ойида корпорация Kairos Power билан эриган туз реакторларини ишлаб чиқиш учун бирлашди. Бироқ The Register таҳлилчиларининг фикрича, технологик гигантларнинг бундай қадамлари ҳам 2027 йилга келиб кутилаётган энергия танқислигини бартараф эта олмайди.
Google’нинг энергия истеъмоли ўсиши сунъий интеллектнинг ривожланиши билан бевосита боғлиқ. Компаниянинг 2024 йилги ҳисоботида таъкидланишича, сунъий интеллект инфратузилмаси туфайли иссиқхона газлари чиқиндилари йил давомида 13 фоизга, 2019 йилдан бери эса 48 фоизга ошган. Шу билан бирга, Alphabet 2025 йилда маълумотлар марказларини кенгайтиришга 75 миллиард доллар сармоя киритишни режалаштирмоқда, бу эса энергия тармоқларидаги юкламани янада оширади.
Изоҳ (0)