Ўзбекистонда атом электр станцияси қурилишига бир нечта банклар сармоя киритмоқчи. Бу ҳақда “Ўзатом” агентлиги ҳузуридаги АЭС қурилиши дирексияси директори Отабек Омонов маълум қилди.
Жорий йил Ўзбекистонда илк бор атом электр станцияси (АЭС) қуриш ишларига киришилди. Умумий қуввати 330 мегавватли станция Жиззах вилояти Фориш туманида Россиянинг “Росатом” тузилмасидаги “Атомстроэкспорт” АЖ томонидан қурилади.
Бугун, 15 октябрь куни Тошкент шаҳрида ўтказилган илмий анжуманда мазкур лойиҳа ва Ўзбекистонда атом энергетикасини ривожлантириш масаласи муҳокама қилинди. Бу ҳақда “Дарё” мухбири хабар берди.
Тадбирда ўнга яқин давлатлардан келган халқаро экспертлар иштирок этди. Мулоқот давомида АЭС қуришнинг глобал тенденциялари, ижтимоий–иқтисодий ҳамда экологик хавфсизлик масалалари муҳокама қилинди.
“Ўзатом” агентлиги ҳузуридаги АЭС қурилиши дирексияси директори Отабек Омонов лойиҳа бўйича жорий йил якунига қадар ва 2025 йил давомида қандай ишлар бажарилишини айтиб ўтди.
“Ҳозир АЭС майдонида режим-кузатув ишлари олиб бориляпти. Майдон янада чуқур ўрганилмоқда. Қурувчилар учун кичкина шаҳар қуриш ишлари бошланди. АЭС қурилишининг энг қизғин даврида майдонда 10 минг нафаргача қурувчи ишлайди. Биз уларга шароит яратиб беришимиз керак. Россия делегацияси келган. Улар билан кичик АЭС қуришнинг техник шартини кўриб чиқяпмиз. Қурилиш-монтаж базасини техник шартлари ҳам кўриб чиқилмоқда. Шу билан бирга, ТЕО, яъни техник иқтисодий асосларни ҳам ишлаб чиқяпмиз. Мақсадимиз жорий йил охиригача техник-иқтисодий асос, экология ва бирламчи хавфсизлик ҳисоботини бошлаш. 2025 йил якунигача майдончага АЭС жойлашуви бўйича рухсатнома олмоқчимиз. Муҳим асбоб-ускуналарни ҳам ўз вақтида жойлаштирсак, 2029 йил якунида станциянинг биринчи қисми ишга туширилиши мумкин”, деди мутахассис.
Отабек Омоновнинг таъкидлашича, АЭС қурилиши инвестиция маблағлари ҳисобидан амалга оширилади. Ҳозиргача бир неча банклар сармоя киритиш таклифини билдирган.
“Ҳозирда бир неча Европа, Россия ва маҳаллий банклар билан АЭСга сармоя киритиш бўйича музокара олиб бориляпти. Керакли таклифлар раҳбариятга тақдим этилган. Қайси банклар бизга маъқул таклиф берса, улар билан ҳамкорлик қилинади. Чет эл банклари кредити ҳам инвестицияга тенглаштирилади”, деди дирексия раҳбари.
Аввалроқ АЭСнинг биринчи блоки 5 йил ичида ишга туширилиши маълум қилинганди. Лойиҳа тўлиқ ишга туширилиши учун эса 7-8 йил вақт талаб этилади. Станциянинг умумий майдони 50 гектарга яқин бўлиб, у тўлиқ ишга тушса, йилига 3 миллиард киловатт/соатгача электр энергияси ишлаб чиқариши кутилмоқда.
Изоҳ (0)