Афғонистоннинг Қўштепа канали қурилиши бўйича лойиҳанинг иккинчи қисми 58 фоизга якунланди. Бу ҳақда Қўштепа каналини ривожлантириш миллий компанияси вакили Саид Забиҳулла Мирий маълум қилди.
Ҳозирда қурилишга 3,5 минг киши ва 3 минг техника жалб этилган. Қўштепа канали 5 йилдан кейин ўз фаолиятини бошлайди, дея қўшимча қилди Саид Забиҳуллоҳ Мирий.
“Толибон” режасига кўра, канал Балх, Жузжон ва Фарёб вилоятларидаги 500 минг гектарга яқин ерни сув билан таъминлаши керак. Қўштепа каналининг ишга туширилиши Афғонистонга йиллик ўртача 500 миллион доллар даромад келтиради, деган эди афғон сув ресурсларини бошқариш бўйича эксперт Нажибулла Садид.
Мутахассисларга кўра, Афғонистонда қурилаётган Қўштепа канали умумий дренаждан йилига 10 куб километр сув олади, хусусан, бу Амударёга ҳам тегишли.
“Толибон”нинг йирик лойиҳаси ва хавфлар
Қўштепа канали лойиҳаси Амударёнинг сув ресурсларини бошқариш соҳасидаги йирик лойиҳалардан биридир, у ҳозирда Афғонистон шимолида амалга оширилмоқда. Каналнинг биринчи босқичи ишга туширилган, аммо Марказий Осиё давлатлари бу лойиҳадан хавотирда.
The Economist прогнозига кўра, агар канал қуриб битказилса, минтақавий можаронинг кучайишига олиб келиши мумкин. Канал Амударё сувини Ўзбекистон билан чегарага йўналтиради. Афғонистон электр энергиясининг катта қисмини Ўзбекистондан импорт қилиши ҳисобга олинса, “Толибон” қўшни республикага қарши чиқолмаслиги мумкин.
“Иқлим ўзгариши Ўзбекистонни 15 фоиз сув йўқотишига сабаб бўлмоқда, агар канал қурилиши ортидан яна 10 фоиз йўқоца, Ўзбекистон 25 фоиз сув йўқотиши мумкин”, дейилади яна бир прогнозда.
Ўзбекистон президенти Шавкат Мирзиёев “Толибон” томонидан Қўштепа канали қурилиши Марказий Осиёдаги сув режими ва мувозанатини ўзгартиришини айтганди. “Толибон” эса Ўзбекистон Қўштепа каналидан зарар кўрмаслигига ваъда берган.
Изоҳ (0)