Рим папаси Лев XIV машҳур санъаткорлар ва сиёсатчилар билан қариндошлик алоқаларига эга экани маълум бўлди. Бу ҳақда The New York Times тарихчи Генри Луис Гейтс кичик олиб борган тадқиқотга таяниб ёзмоқда.
Манбага кўра, Лев XIV папаликдан олдинги исми Роберт Превост бўлиб, у Чикагода туғилган. У Мадонна ва Жастин Бибер билан умумий аждод — Канаданинг Труа Ривер шаҳрида туғилган зодагон Луи Буше де Гранпре орқали боғланган. Тадқиқотда у тахминан олти авлод аввал яшагани айтилмоқда.
Қизиғи шундаки, папанинг насабида ушбу аждоднинг борлиги уни Канаданинг собиқ бош вазири Жастин Трюдо, актриса Анжелина Жоли ва АҚШ сиёсатчиси Ҳиллари Клинтон билан ҳам узоқ қариндош эканини билдиради.
Мутахассисларнинг таъкидлашича, бундай ҳолатлар айниқса Канада аҳолиси орасида кенг тарқалган. Бунга Шимолий Америка ва Европада юзлаб йиллар давомида шаклланган мураккаб никоҳ ва миграцион жараёнлар сабабдир.
Айниқса, Франция, Ирландия ва Шотландиядан Канадага кўчган муҳожирлар орасида оилалар авлодлар давомида бир-бирига туташган. XVII–ХIX асрларда Канада ҳудудидаги насроний жамоаларда турмуш қуриш даражаси юқори бўлган ва кўплаб оилалар бир-бири билан қариндошликка кириб борган. Шу сабабли, ҳозирги кунда Канадада туғилган кўплаб машҳур шахслар узоқ қариндош бўлиши мумкин.
Изоҳ (0)