Россия Федерациясининг Иркуцк вилоятида 23 йил олдин ўлган қизнинг кундалигидаги ёзувлар асосида уни ўлдирган эркаклар қўлга олинди. Бу ҳақда Россия ички ишлар вазирлиги расмий вакили Ирина Волк ўзининг Telegram каналида хабар берди.
Воқеа юзасидан Россия Жиноят кодексининг 105-моддаси (қасддан одам ўлдириш) бўйича жиноят иши қўзғатилган. Идора маълумотларига кўра, 2001 йил октябрь ойида икки жиноятчи таниш қизни ўлдириб, жасадни Байкал кўчасидаги ташландиқ бино поли остига яширган. Жиноятчиларни дарҳол қўлга олишнинг имкони бўлмаган.
“2024 йилда ўтган йиллардаги жиноятларни очиш бўйича олиб борилган ишлар давомида жиноят қидирув ходимлари қизнинг атрофидаги асосий гувоҳни аниқлади. У жабрланувчининг кундалигини сақлаб қолганди. Ундаги ёзувлар гумонланувчиларни аниқлаш имконини берди. Жами 20 дан ортиқ шахс сўроқ қилинди. Натижада терговчилар ва тезкор ходимлар жиноят тафсилотларини тўлиқ тиклашга эришди”, дейди Ирина Волк.
Гумонланувчилар қўлга олинган. Улардан бирини суд аллақачон 16 йил муддатга озодликдан маҳрум қилган ва қаттиқ режимли колонияга юборилган.
Россияда 11 кишини ўлдирган қотил тишлари суғуриб олингани учун колонияни судга бергани хабар қилинганди.
Изоҳ (0)