Россияда 11 кишини ўлдирган қотил Телман Сайфиев умрбод қамоқ жазосини ўтаётган Перм ўлкасидаги “Оқ оққуш” колониясига қарши суд даъвоси қўзғатди. Эркак сифатсиз стоматологик хизмат учун товон пули талаб қилиб, суд жараёнида қисман ғалаба қозонди. Бу ҳақда SHOT Telegram канали хабар бермоқда.
“Сайфиев судга мурожаат қилиб, унга тиш протезлаш рад этилгани ва тишларини даволаш имконияти берилмаганини маълум қилди. Сўнгги йилларда унинг 11 та тиши олиб ташланган”, деб ёзмоқда журналистлар.
Маҳбуснинг таъкидлашича, унинг тишларини даволаш ўрнига суғуриб олишган. Бу ҳолат 20 йил мобайнида 1999 йилдан 2019 йилгача давом этган.
Сайфиев колония маъмуриятига қарши яна бир даъво аризаси киритган. Унинг айтишича, колония ходимлари унга ва бошқа маҳбусларга пандемия пайтида ниқоб тақишни ман этган. Шу билан бирга, унинг аниқлик киритишича, шу даврда маҳкумлар ишлашда давом этишган.
Сайфиев икки даъводан 600 минг рубль ундирмоқчи бўлган, бироқ суд талабларни қисман қаноатлантирган. Колониядан 30 минг рубль ундирилиши белгиланган.
Перм ўлкасининг Соликамск шаҳрида жойлашган 2-сонли махсус тартибли ахлоқ тузатиш колонияси “Оқ оққуш” номи билан машҳур бўлиб, Россиядаги энг қаттиқ тартибли қамоқхоналардан бири ҳисобланади. Унинг норасмий номини қандай олгани номаълум, бироқ маъмурият бу номни қамоқхона безагида акс эттирган.
Қамоқхонада ўта оғир жиноятлар содир этган жиноятчилар жазосини ўтайди. Уларнинг кўпчилиги умрбод қамоқ жазосига ҳукм қилинган маҳбуслар ҳисобланади.
Изоҳ (0)