Ўзбекистон билан Тожикистон ўртасида Иттифоқчилик муносабатлари тўғрисидаги шартнома кучга кирди. Бу ҳақда Президент матбуот хизмати хабар берди.
Шавкат Мирзиёев Хўжанд шаҳрига келгач, Тожикистон президенти Эмомали Раҳмон билан учрашув ўтказди. Музокаралар якунида Шавкат Мирзиёев ва Эмомали Раҳмон ҳузурида ташқи сиёсат идоралари раҳбарлари Ўзбекистон билан Тожикистон ўртасида Иттифоқчилик муносабатлари тўғрисидаги шартноманинг кучга кириши ҳақидаги баённомани имзолади ва ратификация ёрлиқларини алмашди.
Шартнома ўтган йили 18 апрель куни Душанбе шаҳрида бўлиб ўтган олий даражадаги икки томонлама саммитда имзоланган эди.
Ҳужжат ратификация ёрлиқлари алмашилган кундан эътиборан кучга киради.
Бугун, 31 март куни Шавкат Мирзиёев амалий ташриф билан Хўжанд шаҳрига етиб борди. Аэропортда давлат раҳбарини Тожикистон Республикаси президенти Эмомали Раҳмон кутиб олди. Ўзбекистон раҳбарининг ташрифи шарафига давлат байроқлари кўтарилди. Миллий куй-қўшиқ ва рақслар ижро этилди.
Бугун, шунингдек, Ўзбекистон, Тожикистон ва Қирғизистон президентларининг уч томонлама учрашуви бўлиб ўтади.
Музокаралар якунида Ўзбекистон, Тожикистон ва Қирғизистон давлат чегараларининг туташ нуқтаси тўғрисидаги шартномани имзолаш режалаштирилган.
Изоҳ (1)
Bu juda yaxshi yangilik. Tahlilchilar bu ittifoqchilikni Markaziy Osiyoda tinchlik va xavfsizlikni ta’minlashning konstruktiv asosi sifatida baholaydi. Shartnoma O‘zbekiston va Tojikistonning strategik sherikligini yanada mustahkamlashga xizmat qiladi.