Марказий банкнинг Банк назорати қўмитаси томонидан 2025 йилнинг февраль ойидаги йиғилишларида (8 марта) 43 та масалани кўриб чиқилди ва тегишли қарорлар қабул қилинди. Бу ҳақда МБ матбуот хизмати хабар берди.
Маълум қилинишича, рўйхатга олиш ва рухсат бериш йўналишида 31 та масала, шу жумладан, кредит ташкилотлари уставига киритилган ўзгартиришларни рўйхатдан ўтказиш (8 та), янги очилаётган микромолия ташкилотларини ҳисоб рўйхатдан ўтказиш (3 та), кредит ташкилотларининг устав фондидаги улушига эгалик қилиш учун рухсат бериш (5 та) ва ваколатхона очишга рухсат бериш (1 та), шунингдек, тижорат банклари кузатув кенгаши ва бошқаруви аъзолари ҳамда муҳим аҳамиятга эга ходимларининг номзодларини кўриб чиқиш (13 та) билан боғлиқ масалалар кўрилди.
Шу билан бирга, “ISHONCH ПЛЮС ҲАМКОР МИКROMОЛИЯ ТАШКИЛОТИ” МЧЖнинг таъсисчилари томонидан ташкилотни тугатиш тўғрисида қарор қабул қилинганлиги муносабати билан ушбу микромолия ташкилоти давлат реестридан чиқарилди.
Бундан ташқари, кредит ташкилотларининг молиявий ҳолатига оид 12 та масала – Марказий банкнинг кўрсатмалари ва пруденсиал меъёрлари талабларининг бажарилиши, тижорат банкларида ўтказилган ўрганиш натижалари ҳам муҳокама қилинди.
Марказий банк томонидан ўтказилган ўрганишлар натижасида аниқланган камчиликлар, жумладан, Марказий банк томонидан ўрнатилган иқтисодий меъёрларга ва қонунчилик талабларига риоя қилинмаганлиги учун 3 та банк чора ва санкциялар қўлланилиши тўғрисида огоҳлантирилди.
Шунингдек, амалдаги қонунчилик, Марказий банк томонидан ўтказилган ўрганиш ва инспекция текширувлари давомида аниқланган қоидабузарликлар учун 5 та банкка нисбатан жарима санкцияси қўлланилди.
Марказий банк февраль ойида ўнта банкни жаримага тортгани ҳақида хабар берилганди.
Изоҳ (0)