“Очиқ бюджет” порталида “Ташаббусли бюджет” жараёнининг 2025 йилнинг 1-мавсуми ғолиб лойиҳалари эълон қилинди. Бу ҳақда Иқтисодиёт ва молия вазирлиги хабар берди.
Маълум қилинишича, жараёнларда мамлакат бўйлаб жами 10 млн 450 мингта овоз берилди.
Овоз бериш жараёни якунларига кўра, 3,2 трлн сўмлик 2 369 та лойиҳа ғолиб деб топилди.
Шу билан бирга, Қува туманида фуқаролар мажбурий овоз тўплашга жалб этилиши ҳолати қайд этилгани сабабли мажбурий овоз тўпланган лойиҳаларга аниқлик киритилмоқда, ўрганиш натижаларига кўра, мазкур туман бўйича ғолиб лойиҳалар қўшимча равишда эълон қилинади.
Ғолиб бўлган лойиҳалар билан бу ерда танишиш мумкин.
Аввалроқ “Ташаббусли бюджет” дастури доирасида мажбурий овоз тўплангани аниқланган лойиҳалар овоз бериш босқичидан четлатилиши ҳақида хабар берилганди.
Мактабгача ва мактаб таълими вазири Ҳилола Умарова Қува туманидаги мактабларнинг бирида ўқитувчиларнинг ойлик маошидан овоз йиғиш учун 700 минг сўмдан ушлаб қолишни талаб қилган директор билан меҳнат шартномаси бекор қилинганини айтганди.
Изоҳ (0)