Президент Шавкат Мирзиёев 14 январь куни БАА инвестициялар вазири, АДҚ холдинги бош ижрочи директори Муҳаммад Ҳасан ал-Сувайдий бошчилигидаги ушбу мамлакат етакчи компаниялари делегацияси билан учрашув ўтказди. Бу ҳақда Президент матбуот хизмати хабар берди.
Учрашувда АD Ports Group компанияси раҳбари Муҳаммад Жума ал-Шамисий, Таdweer раҳбари Али ал-Даҳерий, Plenary Group раҳбари Мустафо Фахур ва DUSAB раҳбари Муҳаммад ал-Кураший иштирок этди.
Ушбу компаниялар ўз соҳаларида жаҳон етакчиларидан бири бўлиб, уларнинг жами активлари 200 миллиард доллардан зиёдни ташкил этади.
Юқори технологик тармоқларда амалий ҳамкорликни ривожлантириш ва инвестиция портфелини кенгайтириш имкониятлари кўриб чиқилди.
БАА билан иқтисодиётнинг турли йўналишларида шериклик жадал ривожланиб бораётгани катта мамнуният билан қайд этилди. Инвестицияларни илгари суриш, саноат ва илғор технологияларни ривожлантириш бўйича қўшма чора-тадбирлар амалга оширилмоқда.
Ҳар бир компания билан ўзаро манфаатли ҳамкорликни кенгайтириш бўйича навбатдаги қадамлар белгиланди. Инфратузилмани ривожлантириш, шаҳарсозлик, энергетика, транспорт ва логистика, тоғ-кон саноати, электротехника, коммунал хўжалиги ва бошқа соҳаларда қўшма лойиҳалар ҳақида сўз юритилди.
Инновасион технологияларни жорий этиш, нодир металл конларини ўзлаштириш, минтақавий темир йўлларни ривожлантириш ва “қуруқ” портлар барпо этиш, кабел маҳсулотларини ишлаб чиқариш лойиҳаларини жадаллаштириш, таълим ва тиббиёт соҳаларида ДХШ лойиҳаларини илгари суриш юзасидан келишувларга эришилди.
Учрашув якунида амалий ҳамкорликнинг барча йўналишлари бўйича “йўл харитаси”ни қабул қилишга келишиб олинди.
Изоҳ (0)