Лондоннинг “Тоттенҳэм” клуби ярим ҳимоячи Родриго Бентанкурнинг Англия Лига Кубоги ярим финалининг биринчи ўйинида “Ливерпуль”га қарши учрашувда олган жароҳатидан кейинги ҳолати ҳақида расмий баёнот берди.
“Родригонинг ҳушида экани, гаплаша олаётгани ва қўшимча текширувлар учун шифохонага йўл олганини тасдиқлаймиз”, дейилади клуб матбуот хизматининг расмий сайтида эълон қилинган баёнотида.
Жароҳат олган футболчи шифохонада ижтимоий тармоқлардаги саҳифасида ҳолати ҳақида пост қолдирди. У постга фотосурат жойлаштириб, шундай деб ёзди:
“Ҳаммаси жойида! Хатларингиз учун раҳмат! Ғалаба билан табриклайман”.
Маълумот учун, учрашувнинг 7-дақиқасида, бурчак тўпи ўйналган вақтда Бентанкур бўйни билан ерга ноқулай тушиб, жароҳат олган. Шифокорлар унга бир неча дақиқа ёрдам берди. Бентанкур мустақил равишда ўрнидан тура олмади ва уни замбилда майдондан олиб чиқишга мажбур бўлишди.
Ушбу учрашувда “Тоттенҳэм” “Ливерпуль”ни минимал (1:0) ҳисобда енгди. Жавоб беллашуви 6 февраль куни “Энфилд”да бўлиб ўтади.
Изоҳ (0)