АҚШ Украинанинг узоқ масофали ракеталарга муҳтожлиги ҳақидаги фикрга қўшилмайди. Киев узоқ масофаларни босиб ўта оладиган дронларни оммавий ишлаб чиқариш имкониятига эга. Бу ҳақда АҚШ Мудофаа вазири Ллойд Остин маълум қилди.
Римга сафарида Пентагон раҳбарига ҳамроҳлик қилаётган журналистлар ундан АҚШнинг Киевга узоқ масофага учувчи дронлар ишлаб чиқариш учун 800 миллион доллар ажратиш ҳақидаги қарорига изоҳ беришни сўрашди.
“Биз Украина узоқ масофани босиб ўтишга қодир дронларни оммавий ишлаб чиқариш потенциалига эга эканини кўрмоқдамиз. Улар бундай дронларни баллистик ракета нархининг бир қисмига тайёрлай олади”, дейди Остин.
“Шундай экан, уларнинг бу имкониятини ривожлантиришга сармоя киритиш мантиқан тўғри бўлади. Бу ҳолат, менинг фикримча, Украинада келажакда ҳам юзага келадиган эҳтиёжларга жавоб беради”, деб қўшимча қилди Остин.
21 октябрь куни Украина президенти Владимир Зеленский Киев Вашингтондан тахминан 1,6 миллиард долларлик янги ҳарбий ёрдам пакетларини кутаётганини ва узоқ масофали қуролларини ишлаб чиқариш учун йил охиригача яна 8 миллиард доллар олишга умид қилишини айтди.
Ўша куни АҚШ Мудофаа вазири Ллойд Остин Киевга ташрифи чоғида Украинага 400 миллион долларлик қурол-яроғ етказиб бериш бўйича навбатдаги ёрдамни эълон қилди. Россия Федерациясининг Украинадаги ҳарбий ҳаракатлари бошланганидан бери Вашингтон Киевга жами 59 миллиард доллардан ортиқ миқдорда ҳарбий ёрдам ажратди.
Изоҳ (0)