Ўтган ҳафтада Reuters ва CNN пулли обунани жорий этган энг сўнгги янгиликлар сайтларига айланди. Икки ташкилот ўртасида жуда кўп умумийлик бор: иккиси ҳам 1995 йилда рақамли қамровни бошлаган ва ҳозир қайси таклифлар ўқувчиларни обуна бўлишга ундаши мумкинлигини аниқлаш жараёнида.
Уларнинг саъй-ҳаракатлари реклама даромадлари, шунингдек, ҳажмга асосланган журналистика бозори пасайган бир пайтда амалга оширилмоқда. Яқинда Pew тадқиқотига кўра, америкаликларнинг катта қисми — 86 фоизи рақамли қурилмаларидан ҳеч бўлмаганда баъзи янгиликларни олиши аниқланди. Халқаро News Media ассоциациясининг тадқиқотчиси Грег Пихота кузатганидек, ўқувчиларнинг аксарияти ўзлари истеъмол қилган янгиликлар учун пул тўламайди. Лекин кўпчилик буни маълум нарх эвазига қилишга тайёр ва глобал талаб мавжуд.
“Дунё бўйлаб кўпгина индивидуал миллий янгиликлар брендлари ўзларининг пулли онлайн маҳсулотлари билан ўз бозорларидаги уй хўжаликларининг 1 фоиздан камига етиб боради”, деди у.
Reuters
Лицензиялаш бизнеси билан машҳур бўлган Reuters учун пулли обуна тўғридан-тўғри истеъмолчилар тармоғи билан ишлайдиган Reuters Professional’ни ривожлантиришга қаратилган. Reuters веб-сайти ва иловасига канадалик ташриф буюрувчилардан энди ҳафтасига бир доллар олинади. Келгуси ойларда бу жараён АҚШ ва Буюк Британияда ҳам бошланади. Охир-оқибат пулли обуна тўлиқ глобал бўлади.
Reuters ўзининг рақамли аудиториясини 2021 йилда рўйхатдан ўтказишни бошлади. Шундан бери дунёнинг 240 мамлакати ва ҳудудидан ўқувчилар бу сайтни кузатиб боради. Компания ойига 45-50 миллионгача уникал ташриф буюрувчиларга эга эканлигини айтади. Янги ташаббус, Лондоннинг таъкидлашича, турли йўналишлар бўйича мавжуд таклифларни амалга ошириш учун мўлжалланган.
У мақсадлар, жорий даромад ёки келажак режаларини ошкор қилишдан бош тортди; компания ҳали пулли обуна қатъий бўлиб қоладими ёки динамик моделга ўтадими, бир қарорга келмаган. “Биз маълумотларни кузатамиз, мослашамиз ва вазиятни ўрганиб борамиз”, деди у. Унинг фикрича, компаниянинг обрўси — Reuters ишонч рейтингларида юқори ўринни эгаллайди — ижобий натижалар ваъда қилади.
“Биз фикр билдирмаймиз. Биз одамларга нимани ўйлаш, нимани сотиб олиш, кечки овқатга нима қилиш кераклигини айтишга ҳаракат қилмаймиз. Биз бошқа ахборот ташкилотларидан фарқли равишда фактларни етказишга қаратилган тор йўналишга эгамиз. Биз бу йўналиш жуда жозибали деб ўйлаймиз”, деди у.
CNN
Ташриф буюрувчилардан ойига 3,99 ёки йилига 29,99 доллар тўлашни талаб қиладиган CNN учун пулли обуна унинг бош директори Марк Томпсон ишлаб чиққан узоқ муддатли ўзгаришларнинг бир қисмидир. CNN ўз баёнотида тўловни “CNN’нинг кашшоф руҳини тиклаш” ва “келажакдаги янгиликлар тажрибасини ривожлантиришда етакчи мавқега эга бўлиш” йўлидаги ҳаракат сифатида эътироф этди.
“Ушбу ишга тушириш CNN’нинг истеъмолчига йўналтирилган рақамли маҳсулот компаниясига айланиш йўлидаги биринчи қадамдир”, деб ёзди компаниянинг ижрочи вице-президенти Алекс Маккалум. Келгуси ойларда “биз янги маҳсулотлар ва корхоналар яратамиз, маҳсулот, муҳандислик, маълумотлар ва обуналарда янги имкониятларни ишга соламиз ва ишимизни ривожлантирамиз”, дея қўшимча қилди у.
Бунга CNN’нинг аналитик инфратузилмасини ривожлантириш ҳам киради, чунки компания сайтга кириш учун рўйхатдан ўтганларнинг хатти-ҳаракатларини кузатиб боради.
Ўз ҳисобига кўра, CNN веб-сайти ва иловаси ойига 150 миллион уникал ташриф буюрувчиларга эга. Телевизион томошабинлар сони камайгани сабабли, ушбу аудиториядан фойдаланишни бошлаш умидида. Сўнгги тўрт йил ичида кабел абонентлари сони учдан бирига камайди; рейтинглар пасайган; бу йил биринчи марта реклама берувчилар рақамли видео платформалар ва чакана оммавий ахборот воситаларига телевидениедан кўра кўпроқ пул сарфлашлари прогноз қилинмоқда. CNN кабел томошабинларининг ўртача ёши олтмиш етти; кўпчилик ёшлар янгиликларни бошқа воситалар орқали олишади. 2020 ва 2023 йиллар оралиғида CNN даромади тахминан бир миллиард доллардан 892 миллион долларгача камайди.
CNN ўзининг рақамли стратегияси сабр-тоқатни талаб қилишини тушунмоқда. Ўтган йилнинг шу вақтида тармоқ бошқарувини ўз зиммасига олган Томпсон аввалроқ New York Times газетасининг рақамли қайта кўриб чиқилишини назорат қилган ва у ерда бош директор сифатида нафақага чиққан. New York Times рақамли даромадни икки баравар ошириш мақсадида 2011 йил март ойида пулли обуна жорий қилди. Ўн йил давомида компания ушбу мақсадга эришди. Аммо Times — бу оилавий дўкон; Молиявий муаммоларга эга бўлган Warner Bros.Discovery компаниясига тегишли CNN натижаларни тезроқ кўрсатиши керак бўлиши мумкин.
Марк Томпсон келиши билан CNN ходимларига “янги инқилоб”ни ваъда қилди ва ўшандан бери раҳбарлар “CNN’ни вертикал мобил йўналтирилган формат учун қайта кашф қилиш” режаларини муҳокама қилишди. Бу саъй-ҳаракатларни МакКаллум назорат қилади. У Times’да Томпсон қўл остида ишлаган ва тармоқнинг олдинги раҳбарлигида ишлаб чиқилган обуна оқими хизмати CNN+ нинг бош менежери бўлган.
CNN матбуот котиби Эмили Куннинг таъкидлашича, пулли обуна ташкил қилган юқоридаги иккита компанияни солиштирмаслик керак. “CNN+ буюртма асосида ишлаб чиқарилган янги стриминг хизмати бўлиб, бошланғич аудиторияси нолга тенг. “Унда пулли обуна аудиторияси учун яратилган махсус видео контент ва шоулар мавжуд эди”, деди у. “CNN.com сайтига обуна бўлиш — бу ҳар куни миллионлаб одамларга хизмат кўрсатадиган веб-сайтимиздан фойдаланиш ва бизнинг аввалдан мавжуд бўлган репортажларимизни томоша қилиш имконини беради”.
4 октябрь, жума куни CNN ўзининг бош саҳифасида кўрсатилган обуначилар учун биринчи эксклюзив контентини чиқарди: сиёсий кампанияларда эркаклар ролини ўрганувчи қисқа ҳужжатли фильм (“Flash Docs”). 2022 йилда CNN+ телеканалининг бир қисми сифатида қисқа, замонавий ва долзарб поп-маданият ҳикояларини тайёрлаш учун ташкил этилган “Flash Docs” бўлими ўн дақиқадан камроқ ҳужжатли фильмлар сериясини ишлаб чиқади. Обуначилар ҳам камроқ рекламаларни кўришади. Тўлов тизими ҳамма нарсага тааллуқли бўлмайди. CNN тайёрлайдиган вертикал видеолар ҳамма учун бепул бўлади.
Пойнтер институтининг медиа-бизнес таҳлилчиси Рик Эдмондс айтганидек, ўз телефонларига кўпроқ боғланган ёшлар янгиликларга унчалик қизиқмайди, лекин улар бунинг учун пул тўлашга кўпроқ тайёр. “Улар ўйин-кулги учун пул тўлаш керак бўлган дунёда яшайдилар. Шунинг учун уларга пулли обуна ғайритабиий туюлмайди”, деди у.
Оксфорд университети қошидаги Reuters институти томонидан ҳар йили янгиликлар истеъмолчилари ўртасида ўтказган сўровнома таҳлилига кўра, АҚШнинг онлайн пулли янгиликлар бозори аввалгисидан икки баравар кўпроқ ўсиши мумкин. Таҳлиллар шуни кўрсатдики, истеъмолчиларнинг пулли платформаларга ўртача кириши 3,5 баравар кўпайган.
“Менимча, онлайн янгиликларга обуна бўлишнинг чегараси йўқ”, дейди Пихота. “Тасаввур қилинг, сиз Нью Йорк марказидаги Оne World Trade осмонўпар биноси олдида турибсиз. Аксарият янгиликлар брендлари бу бинонинг фақат биринчи қаватига етиб борган, юзинчи қават эса булутлар ичида узоқда қолмоқда”.
Аввалроқ «Daryo.uz» сайтида ҳам айрим мақолаларни ўқиш пулли бўлганини хабар қилган эдик.
Чунки профессионал журналистлар жамоасини тузиш, сифатли контент яратиш, ўқувчилар талабига муносиб жавоб бериш, албатта, ўзига хос маблағни талаб этади.
«Daryo» сайти обуначилар талабидан келиб чиқиб хабар ва мақолалар сифатини ошириш учун изланишда давом этади.
Изоҳ (0)