Ўзбекистон Кабо-Верде ва Сейшел ороллари билан дипломатик алоқаларни ўрнатди. Бу ҳақда ТИВ матбуот хизмати хабар берди.
Вазирлик раҳбари Бахтиёр Саидов ташқи ишлар, ҳамкорлик ва минтақавий интеграция вазири доктор Руй Альберто де Фигейредо Соареш билан биргаликда Ўзбекистон ва Кабо-Верде ўртасида дипломатик муносабатлар ўрнатиш тўғрисида қўшма коммюникени имзолади.
“Шубҳасиз, янги ҳамкорлик мамлакатларимиз халқлари учун янги имкониятлар очади”, деб ёзди Бахтиёр Саидов Telegramъдаги саҳифасида.
Шунингдек, ташқи ишлар ва туризм вазири Силвестр Радегонд билан учрашув чоғида Сейшел ороллари билан дипломатик алоқалар ўрнатиш бўйича қўшма коммюнике имзоланди.
“Истиқболли ҳамкорликнинг муҳим йўналишлари, айниқса, халқ дипломатияси ва сайёҳлик алмашинувини ривожлантиришда кўплаб имкониятлар мавжудлигини таъкидладик”, деди Бахтиёр Саидов.
Кабо-Верде Африканинг ғарбий соҳилларида жойлашган, 10 та катта ва 5 та кичик оролдан иборат мамлакат ҳисобланади. Сейшел ороллари эса Африканинг шарқий қисмида, Ҳинд океанида жойлашган.
Май ойида Ўзбекистон Жибути билан дипломатик муносабатлар ўрнатганди. Шундай қилиб Ўзбекистон билан дипломатик алоқалар ўрнатган давлатлар сони 150 тадан ошди.
Изоҳ (0)