Ўзбекистон—Германия саммити якунида дарахт экиш маросими бўлиб ўтди, деб хабар бермоқда Президент матбуот хизмати.
Президент Шавкат Мирзиёев ва Германия канцлери Олаф Шольц Самрақанддаги Конгресс маркази хиёбонида биргаликда дарахт экди.
Таъкидланишича, бу Ўзбекистон—Германия кўп қиррали муносабатларида янги босқич бошлангани, халқлар ўртасидаги дўстлик ва ҳамкорлик ришталари мустаҳкамланиб бораётганининг рамзи бўлди.
Шу билан президентнинг Самарқандга ташрифи якунланди, давлат раҳбари Тошкентга қайтиб келди.
Германия канцлери Олаф Шольц Шавкат Мирзиёевнинг таклифига биноан 15 сентябрь куни Самарқандга келганди. Ташриф давомида олий даражадаги музокаралар ўтказилди. Унда Ўзбекистон—Германия кўп қиррали ҳамкорлигини янада ривожлантириш масалалари кўриб чиқилди.
Музокаралар якунида Шавкат Мирзиёев ва Германия канцлери Олаф Шольц Қўшма декларацияни қабул қилди, 8 та икки томонлама ҳужжат имзоланди. Бундан ташқари, 2024—2026 йилларга мўлжалланган Технологик шериклик ва саноат кооперацияси дастури қабул қилинди, шунингдек, Ўзбекистон ва Германиянинг етакчи корхоналари даражасида бир қатор битим ва шартномалар тузилди.
16 сентябрь куни Ўзбекистон президенти ва Германия канцлери икки мамлакат ишбилармон доиралари билан учрашув ўтказди. Шундан сўнг улар қўшма Бошқарув кадрларини тайёрлаш мактабини ишга тушириш маросимида иштирок этди.
Изоҳ (0)