Австрияда тўхтовсиз ёғаётган ёмғир туфайли минглаб қалдирғочлар нобуд бўлди. Бу ҳақда Bild хабар берди.
Ҳаво намлиги юқори бўлгани сабабли учиб кетаётган қушлар озиқланадиган ҳашаротлар деярли йўқ. Мазкур муаммога паст ҳарорат ҳам қўшилиб, қушларнинг ҳолатига таъсир кўрсатган. Юзлаб қалдирғочлар дераза токчаларида исинишга ҳаракат қилмоқда, йўлакларда нобуд бўлган қушлар ётгани таъкидланган.
“Биз жуда заифлашган қалдирғочлар галасини кўрмоқдамиз, улар ёрдамсиз яшай олмайди ва ҳатто нобуд бўлмоқда”, дейди Tierschutz Austria ҳайвонот муҳофазаси ташкилоти.
Ҳайвонлар ҳуқуқлари ҳаракати фаоллари аҳолини жабрланган қушларни қутиларга йиғиб, қутқарув марказларига олиб келишга чақирган. Шунингдек, қушларни боқиш учун хайрия қилиш сўралмоқда.
“Биз доимо алоқадамиз, аммо мурожаатлар сони имкониятларимиздан ошиб кетади. Шунинг учун зудлик билан Вена ва унинг атрофидаги қушларни бизга олиб келиш учун автомобиль ва ҳайдовчилик гувоҳномасига эга одамларни қидирмоқдамиз”, дейди фаоллар.
Изоҳ (0)