Россиянинг Санкт-Петербург шаҳридаги омборда ўзбекистонлик ишчи тигел пресс ичига кириб кетиши оқибатида вафот этди. Бу ҳақда “78.ru” хабар берди.
Воқеа 6 сентябрь куни Первомайский туманидаги омборхонада содир бўлган. 26 ёшли ўзбекистонлик йигит эҳтиётсизлиги сабабли тигел прессига кириб кетган. Йигит олган жароҳатлари туфайли вафот этди.
“Воқеа жойига тергов гуруҳи етиб келган. Ишчининг жасади ўлим сабабини аниқлаш учун ўликхонага жўнатилди”, дейилади хабарда.
Маълум қилинишича, фуқаро миграция органларида рўйхатдан ўтмаган ва расман ишга жойлашмаган.
Ҳозирда ҳолат юзасидан суриштирув ишлари олиб борилмоқда. Шунингдек, “меҳнат хавфсизлиги қоидаларини бузиш” моддаси бўйича жиноят иши қўзғатиш масаласи ҳал қилинмоқда.
Изоҳ (0)