Қозоғистонда 6639 та онлайн казино ва букмекерлар блокланди. Бу ҳақда мамлакат Туризм ва спорт вазирлиги хабар берди.
Хабарга кўра, яна 1237 та интернет ресурслар фаолияти қайта кўриб чиқилмоқда. Бундай сайтларни аниқлашда Бош прокуратура, Молиявий мониторинг агентлиги ва Ички ишлар вазирлиги ҳам иштирок этмоқда.
Бундан ташқари, Қозоғистонда йил бошидан буён ноқонуний лотереялар ташкилотчиларига нисбатан 103 та маъмурий баённомалар тузилган. Судлар томонидан 48 нафар фуқаро жавобгарликка тортилган.
“Вазирлик фуқароларнинг ҳуқуқларини ҳимоя қилиш ва онлайн хизматлар бозорида тартибни сақлаш мақсадида ушбу соҳалардаги ноқонуний хатти-ҳаракатларни назорат қилиш ва бартараф этишда давом этади”, дейилади вазирлик баёнотида.
Аввалроқ Қозоғистонда давлат хизматчилари, ҳарбийлар, ҳуқуқни муҳофаза қилиш ва махсус идоралар ходимларига қимор ўйнаш ва унга пул тикиш тақиқланиши мумкинлиги ҳақида хабар берилган эди.
Туризм ва спорт вазирлигида тегишли петицияни кўриб чиқиш бўйича ишчи гуруҳ йиғилиши бўлиб ўтган. Вазирлик раҳбари Мирас Тулебоев тақиқни назарда тутувчи петицияни 50 минг киши имзолагани, кодексга кўра, вазирлик 40 кун ичида тегишли қарор қабул қилиши кераклигини айтган.
Вазирлик аллақачон қимор бизнесида давлат назоратини кучайтиришни, шунингдек, давлат аппаратида гиёҳвандликнинг олдини олиш бўйича ишларни бошлаб юборганини маълум қилган.
Изоҳ (0)