“Чуқур” сериали Ay Yapim медиа ширкати томонидан Керем Чатай режиссёрлигида суратга олинган. Мазкур лойиҳа драма ва жангари йўналишида бўлиб, унинг премьераси 2017 йил октябрда бўлиб ўтган. Суратга олиш жараёни Истанбулнинг Фотиҳ туманида амалга оширилган, шунингдек, баъзи саҳналар Париж ва Берлинда олинган.
Сериал сюжети
Истанбул чеккасида Чуқур деб аталган маҳаллада бошқарувни қўлга олган, ўз ҳудудини ҳимоя қиладиган ва маҳаллий тўдалар фаолиятини тартибга соладиган нуфузли Кочовали оиласи яшайди. У ернинг асосий қоидасига кўра, гиёҳванд моддаларни маҳалла ичида истеъмол қилиш ёки етиштириш, олиб чиқиш ва киритиш тақиқланган. Аммо бошқа жиноий гуруҳлар маҳалла бошқарувини ўз қўлига олишга ҳаракат қилади ва натижада турли зиддиятлар юзага келади.
“Чуқур” сериали нимаси билан томошабинларни жалб қилган?
“Чуқур” сериали Туркиянинг Show TV телеканалида 2017 йилда намойиш этилган ва тўрт йиллик эфир давомида телевидение рейтингларда етакчиликни қўлдан бой бермаган. Сериал биринчи навбатда пухта ёзилган ва қизиқарли сценарий сабабли муваффақият қозонган.
Ундаги хилма-хил воқеалар томошабинлар кейинги воқеалар ривожи қандай бўлишини тахмин қилишига йўл қўймайди. Лойиҳа жамоаси сериалнинг ўзига хос визуал тилини ишлаб чиқди: Чуқур маҳалласидаги бинолар ва улардаги граффити чизмалари ўзига хос жанговор муҳитни яратган эди.
Сериал тарихда шунчаки барчага таниш турк сериалларидан бири бўлиб қолмади. Лойиҳа устида ишлаш жараёнида ижодкорлар турли ижтимоий ташкилотлар ва фондлар билан ҳамкорлик қилиб, мунтазам равишда муҳим мавзуларни кўтариб чиқишган. Улар орасида, экология, аутизм касаллиги каби долзарб мавзулар ҳам мавжуд.
“Чуқур” сериали актёрларининг бугунги ҳаёти
-lQuZ9qr2.jpeg)
Лойиҳада бош қаҳрамонни гавдалантирган Арас Булут Ийнемли бугунги кунда турли сериал ва фильмларда рол ўйнашда давом этмоқда. У охирги марта “Отатурк 1881-1919” фильмида ишлади ва Туркиянинг биринчи президенти Мустафо Камол Отатурк ролини ижро этди.
Фильм 2023 йил кузда, Туркия Республикаси ташкил топганининг 100 йиллиги муносабати билан ишлаб чиқилди. Асар SİYAD номли Туркия кино танқидчилари уюшмаси томонидан олтита мукофотга сазовор бўлди, жумладан, Арас Булут “Энг яхши эркак роли” номинациясида ғолиб бўлди. 2024 йил 5 январда фильмнинг иккинчи қисми бутун мамлакат кинотеатрларида намойиш этилди.
“Чуқур” сериали томошабинлари Идрис Кочовали учун маълумотлар йиғувчи бўлиб ишлаган Аличо образини алоҳида эътироф этишган. Бошпанасиз эркак ролини ижро этган актёр Риза Кочаўғлу бугунги кунда ҳам кино саноатида фаол ишлаб келмоқда.
Унинг иштирокида “Яхши одамнинг 10 куни” ва “Ёмон одамнинг 10 куни” номли фильмлар Netflixъда намойиш этилди.
Моделлик оламининг энг юқори поғонасига кўтарилган яна бир турк актрисаси Дилан Чичек Дениз сериалда Ямачнинг асосий таянчи ва суянчига айланган Сена образини гавдалантирган. Актриса бугунги кунда ҳам моделлик фаолиятини давом эттирмоқда.
У 2014 йилда “Коинот гўзали” танловида Туркия шарафини ҳимоя қилган. Чичек Дениз мунтазам равишда турли журналлар муқоваси, Armani косметика ва парфюмерия рекламалари учун суратга тушиб келмоқда.
Изоҳ (0)