Россияда ҳарбий сирларни Украинага сотган армия округи ходими қўлга олинди

Россияда ҳарбий сирларни Украинага сотган армия округи ходими қўлга олинди. Бу ҳақда The Moscow Times нашри хабар берган.

Манбада айтилишича, Россия Федерал хавфсизлик хизмати ҳарбий маълумотларнинг хорижга узатилиши юзасидан махсус операция ўтказган. Операцияда ҳарбий округда фаолият олиб борувчи аёл ҳибсга олинган.

Ҳибсга олинган аёл Россия арсеналлари, ҳарбий базалари, омборлари жойлашуви ва захираси ҳақидаги маълумотларни Киевга узатгани аниқланган. Бу маълумотлар эса Украинага махсус операциялар ташкил этишга ёрдам берган.

Ҳибсдаги шахс Ростов-Дон шаҳрида яшаб келган. У 2023 йилнинг январь ойида Жанубий ҳарбий округдаги бўлинма таркибига қўшилган. Бўлинмада махфий ҳарбий маълумотлар билан ишлаб келган.

Расмийлар аёлнинг исм-шарифи ва лавозимини ошкор қилмаган. Аёл айни пайтда қаерда сақланаётгани ҳам маълум қилинмаган. Расмийлар биринчи судга қадар тергов давом этаётганини билдирган.

Аёл Украина махсус хизматлари билан қай тарзда алоқа ўрнатгани ҳозирча маълум эмас. Сўнгги ҳафталарда у Киев ҳарбийлари билан Россияда тақиқланган “Сигнал” хабар алмашиш иловаси орқали бир неча бор гаплашган.

“У тўпланган маълумотларни мессенжер орқали алоқа қилиш вақтида ташқи разведка хизматига ўтказиб берган. Юборилганлар тақиқланган маълумотлар бўлган”, дейилади Россия Федерал хавфсизлик хизмати хабарида.

Аёлнинг содир этган иши билан боғлиқ тергов давом этаётгани хабар қилинган. Агар у давлатга хиёнат қилганликда айбланса, 25 йилгача қамоқ жазосига ҳукм қилиниши мумкин.