Латвия Украинага 500 га яқин дронларни топширади. Улар аллақачон жўнатиш учун тайёрлаб қўйилган. Бу ҳақда Латвия мудофаа вазири Андрис Спрудс ижтимоий тармоқларда маълум қилди.
“Навбатдаги дронлар партияси тайёр. Латвияда ишлаб чиқарилган 500 га яқин дрон украиналикларга турли жанговар топшириқларни бажаришда ёрдам беради”, деб ёзди у.
Эслатиб ўтамиз, Украина бундай ёрдамни дронлар коалицияси доирасида олади. Мазкур ташаббусга Буюк Британия ва Латвия етакчилик қилмоқда.
Аввалроқ Украина ҳарбий дронлари Беларусь ҳаво ҳудудини бузиб киргани хабар берилганди. Беларусь раҳбари Александр Лукашенко 10 август куни Шклов туманига иш сафари чоғида мамлакат ҳаво ҳудудига кириб келган украин дронлари йўқ қилинганини айтиб ўтган. Ушбу кўринишдаги ҳаво ҳужуми Беларусдан ташқари Россиянинг жануби-ғарбий қисмларида ҳам кузатилган.
Изоҳ (0)