Исроил ўтган йилнинг октябрь ойида Ғазода уюштирган ҳаво ҳужуми давомида АҚШ қуроли ишлатилиши оқибатида 43 нафар фаластинлик ҳалок бўлган. Бу ҳақда Amnesty International берган маълумотга асосланиб, CNN нашри хабар берди.
Манбада айтилишича, Amnesty International тергов гуруҳи узоқ вақт давомида АҚШ армияси ва қуролларининг Ғазодаги ҳужумларга алоқадорлиги борасида текширув олиб борган. Оқибатда буни тасдиқловчи бир қанча далиллар топилган.
Октябрь ҳужумларида АҚШ қуроли қўлланилиши оқибатида 43 киши ҳалок бўлгани тасдиқланган. Фуқаролар ҳаво ҳужуми пайтида ишлатилган ялпи ҳужум қуроли оқибатида вафот этган.
Инсон ҳуқуқлари ташкилоти 12 август куни эълон қилган ҳисоботга кўра, Ғазо марказидаги Дайр ал-Балаҳ ҳудудида вайрон бўлган хонадонлар орасидан АҚШда ишлаб чиқарилган тўғридан-тўғри ялпи ҳужум ўқ-дориларини бошқариш тизими бўлаклари топилган. Бу топилма фаластинликлар ўлимида АҚШга ишора қилувчи биринчи далиллардан бири эканлиги айтилган.
JDAM тизими об-ҳавога қараб, юқори аниқликда ва кетма-кет тарзда бомбаларни нишонга олиб борувчи қурол экани айтилган. У ақлли бошқарув механизми билан таъминланган бўлиб, нишонларга катта талафот етказишга имкон беради.
Октябрь ҳужумларида JDAM қўлланиши 19 нафар бола, 14 нафар аёл ва 10 нафар эркак ҳалок бўлишига олиб келган. Бу фуқаролар оддий аҳоли вакиллари бўлиб, ҲАМАС ёки муқобил ҳарбий тузилмаларга алоқадор бўлмаган.
Amnesty International ўз ҳисоботида бундай зарбалар учун Америка қуролларидан фойдаланиш Байден маъмурияти учун шошилинч огоҳлантириш бўлиши кераклигини билдирган. Тергов давом этиши ҳамда далиллар ўрганилиши айтилган.
Изоҳ (0)