Равшан Ҳакимов бошловчи ва продюсер сифатида томошабинларга яхши таниш. Афсуски, у кейинги пайтларда ижодни тарк этиб, АҚШда фаолият юритаётганди. “Дарё”га берган интервьюсида муҳожирликда қийин кунларни бошдан кечиргани, АҚШда ижод қилолмагани ҳақидаги саволларга қуйидагича жавоб берди.
— Америка орзу эмас, бу ерда доллардан бошқа ҳеч нарса йўқ, деб кўп айтаман. У ерда меҳр оқибат ва ватанда ҳис қилинадиган хотиржамлик йўқ. Шу боис АҚШда яшаётганимда “Бўлди, Ўзбекистонга қайтаман”, деган гапни кўп айтардим. Тошкентдан кетаётганимда Голливуд медиа оламида ишлайман, телеканалларида тажриба орттираман деган мақсад бор эди. Аммо у ерга борганимдан кейин орзулар тумандек тарқади. Чунки тил билсангиз ҳам Жо Байден ёки Дональд Трампнинг жияни эмассиз, ҳеч ким сизни қучоқ очиб қарши олмайди.
Аввалига орзуларимни амалга оширишга ҳаракат қилиб кўрдим. Аммо телевидениесида ишлаш учун ҳужжатларим тўғри келмаслиги ва минг инглиз тилини билган тақдиримда ҳам маҳаллий аҳолидек мулоқот қилолмаслигимни таъкидлашарди.
Ҳар ой Тошкентга қайтишга қарор қилиб, адвокатим билан боғлансам озгина кутиб туришимни, ҳужжатлар битишига оз қолганини айтарди. Мана шу умид мени АҚШда 7 йил қолишга мажбур қилди.
Кейин ўзбек телевидениеси учун “Америкада бир кун мен” номли кўрсатувни суратга олиб жўнатишга қарор қилдим. Катта харажат эвазига кўрсатувни суратга олиб жўнатдим, аммо негадир у кўп танқидларга учради. Кейин кўрсатувни фақат YouTube учун суратга оламиз ва АҚШга келган инсонлар учун фойдали маслаҳатлардан иборат бўлади, деб ният қилдим. Аммо у ҳам ўхшамади. Мана шундай сабаблар мени анчайин ижоддан узоқлаштирди, мен ҳам ҳамма муҳожирлар сингари ишлашим ва у ерда яшаш учун курашишим кераклигини тушундим.
Айримлар ўйлагандек, АҚШда доллар дарахтда ўсмайди, уни топиш учун меҳнат қилиш керак. Бир кун ишга чиқмаслик, кишини молиявий қийинчиликка учрашига сабаб бўлади. Тўрт фарзандим, аёлим ва ота-онам Тошкентда қолган, уларни ҳам моддий жиҳатдан таъминлаш масъулияти менда эди. Шу боис, ижодни бир четга суриб, пицца ташувчи, Uber такси ҳатто фура ҳайдовчиси бўлиб ишлаганман, — дейди Равшан Ҳакимов.
Бошловчи нима учун фарзандларини АҚШга олиб кетмагани ва қизининг гапи уни йиғлатгани ҳақида айтди.
— Ҳужжат масаласи сабаб салкам етти йил деганда Ўзбекистонга қайтдим, албатта, оиламни соғиндим. Оиламни АҚШга чақириш ҳақида ҳам кўп ўйлаганман. Аммо қўрққанман. Чунки у ерда ўзлигини йўқотган, тилини унутган ва ота-онасига бўйсунмай қўйган ўзбек оилаларининг фарзандларини кўп кўрдим. Уч қиз ва бир ўғлим бор. 2017 йил катта қизларим 12 ёшга тўлган, ўсмирликка яқинлашаётган ёшда эди.
Аммо бундай яшаш осон бўлмади. Телефондаги отага айланиб қолдим. Танзила қизим билан тортишиб, уни уришдим ва “Нима хоҳлайсан?” деб телефонда бақирдим. Ўшанда “Сизнинг келишингизни”, деб гўшакни қўйиб, йиғлаб қочиб кетди. Ишонасизми, унинг бу гапи юрагимни тирнаб ўтгандек бўлди. Ундан кейин ўғлим билан ҳам худди шундай воқеа бўлди.
Энг ёмони АҚШга кетиб аёлимни ҳам қийнаб қўйдим. У турмуш ўртоғи бўла туриб, 7 йил давомида оилада ҳам эркакнинг ҳам аёлнинг вазифасини бажарди. Рўзғорлик қилишни таниш билишингизга бир-икки марта илтимос қиласиз, барибир кун келиб ҳаммага малол келади. Шу боис, аёлим ҳайдовчиликка ўқиб, мен қилишим керак бўлган ишларни ҳам бажарди. “Шунча йил давомида қўрғоним ва фарзандларимни асраб-авайладинг”, деб унга миннатдорлик билдираман, — дейди Равшан Ҳакимов.
Изоҳ (0)