“Аксарият ҳолатларда пора берган одам жазоланмаяпти” — ССВ раҳбари

Ўзбекистонда аксарият ҳолатларда пора берган одам жазоланмаяпти. Бу ҳақда соғлиқни сақлаш вазири вазифасини бажарувчи Асилбек Худаяров “Ногиронликни белгилашнинг самарали механизмлари ҳамда тиббий-ижтимоий экспертиза хизмати тизимини такомиллаштириш” мавзусида ўтказилган семинарда айтиб ўтди.

9 август куни Ижтимоий ҳимоя миллий агентлигида бўлиб ўтган тадбирда вазир “Газета.уз” мухбирининг ногиронликни белгилашнинг янги тизими коррупциядан қай даражада холи бўлиши ҳақидаги саволига жавоб қайтарди:

“Биринчи ўринда, раҳбариятда, яъни (ҳар бир) тизим бошида турганларнинг ўзида ва жамоасида коррупцияга қарши курашиш бўйича хоҳиш бўлиши керак. Мен сизга ваъда бераман: Соғлиқни сақлаш вазирлиги марказий аппаратида ва, ўйлайманки, Ижтимоий ҳимоя миллий агентлигида, яъни Мансурбек аканинг жамоасида ҳам коррупцияга йўл қўймаслик учун хоҳиш жуда кучли. Буни мен кўпчиликнинг ичида айтишим мумкин.

Иккинчидан, коррупцияга йўл қўймаслик тарбияга боғлиқ, қонундан қанчалик қўрқишга ва қонунга амалга қилишга боғлиқ. Асосийси, менинг ишимда принцип бор: ходим коррупцияга аралашмаслиги, вазифасини тўлиқ бажариши учун (қилаётган) иши ўзига ёқиши ва ўша ишни йўқотиб қўйишдан қўрқиши керак. Бизлар эса ходимларга маош томондан ҳам, шарт-шароитлар томондан ҳам шароит яраташимиз, уларни асоссиз айблашга бормаслигимиз керак, ўшанда у ишини виждонан бажаради”, деди вазирлик раҳбари.

“Аҳолига ОАВ орқали тушунтиришимиз керакки, Ўзбекистонда коррупцияга тасниф берилганда порани олган ҳам, берган ҳам жазоланади. Афсуски, аксарият ҳолатларда порани берган одам жазоланмаяпти”, дея қўшимча қилди Асилбек Худаяров.

Унинг қайд этишича, Соғлиқни сақлаш вазирлиги коррупцияга қарши курашишга тайёр. Вазирликка блогерлар, журналистлар томонидан миш-мишлар орқали эмас, аниқ фактлар билан мурожаат қилинса, вазирлик ҳар бир ҳолат бўйича тагига етиб, унинг юзага чиқарилишига ёрдам беради.

“Мен ваъда бераман: журналистлар билан ишлашга тайёрман. Шундай ҳолатлар бўйича маълумотлар беринглар, марҳамат, бирга ишлайлик”, деган вазирлик раҳбари.

Асилбек Худаяровнинг билдиришича,вазирликда бир ой олдин назорат инспекцияси тайёр бўлди, шунингдек, коруппсияга қарши курашиш департаменти ҳам мавжуд. Агар (коррупциянинг ўзига) сурункали касаллик сифатида юқтирган ходим бўладиган бўлса, унга жойида жазо қўллашга ва буни ҳаммага кўрсатишга тайёр.