“Сербия мамлакатда давлат тўнтаришига тайёргарлик ҳақида Россиядан маълумот олди” — Александр Вучич

Сербия президент Александр Вучич Россиянинг расмий каналлари орқали мамлакатда кутилаётган оммавий тартибсизликлар ҳақида хабардор қилинганини айтди.

Унинг сўзларига кўра, провокациядан мақсад Сербияда давлат тўнтаришини амалга оширишдир.

“Бугун биз Россия Федерациясидан расмий маълумот олдик. Маълумотлар расмий каналлар орқали олинган, биз уни ўрганяпмиз. Хавфсизлик ва Ахборот Агентлиги бунга масъулдир. Сербия ҳукуматида ва бошқа барча жойларда бунга масъул одамлар ўз вазифаларини бажармоқда”, деди Вучич журналистлар билан суҳбатда.

8 август куни Сербиянинг “Vecernje Novosti” газетаси Сербиядаги ғарбпараст мухолифат вакиллари 10 август куни Белградда ўтказилиши режалаштирилган норозилик намойишларидан президент саройини эгаллаб олиш учун фойдаланмоқчилиги ҳақида хабар берди. Шунингдек, улар Александр Вучичга суиқасд уюштиришга тайёргарлик кўраётгани айтган.