“Сени кейинги ҳафта дафн этишади”: Исроилда аҳолига таҳдидли SMS-хабарлар юборилмоқда

Исроилликлар оммавий таҳдидли SMS-хабарлар ҳақида шикоят қилиб, полицияга мурожаат қилишди. Бу ҳақда Тhe Jerusalem Post нашри хабар қилди.

Маълумотларга кўра, одамларнинг телефонларига уларнинг ҳақиқий исмлари, манзиллари ва “Кейинги ҳафтагача дафн этиласиз” дейилган SMS-хабарлар келган.

Исроил полицияси мазкур фактни тасдиқлади ва аҳолидан ҳеч қандай муносабат билдирмасликни, иложи бўлса, хабар юборилган рақамни блоклашни сўради.

Яқин Шарқдаги кескинлашувнинг навбатдаги босқичи Теҳронда ҲАМАС сиёсий бюроси раҳбари Исмоил Ҳаниянинг ўлими ва Байрутда “Ҳизбуллоҳ” ҳаракати ҳарбий қаноти қўмондонларидан бири Фуад Шукрнинг ўлдирилишидан сўнг содир бўлди.

Эрон, ҲАМАС ва “Ҳизбуллоҳ” воқеада Исроилни айблади ва буни жавобсиз қолдирмасликларини билдирди.