Бугунги кунда соғлом бўлиш учун спорт марказларига бориб, тренер кўрсатмасига биноан машқ бажаришга интилишади. Аслида саломатлик учун тоза ҳаво ва манзарали жойларда сайр қилиш, пиёда юриш ва югуриш кони фойдадир.
Олимларнинг аниқлашича, тоза ҳавода сайр қилиш ва табиат ҳақида фикр юритиш спорт залидаги машаққатли машғулотлардан кўра фойдалироқдир. Кунига 40-45 дақиқа тез юриш 60 ёшдан ошган одамларда фикрлаш қобилиятини яхшилайди. Қуйида спорт залга боришдан кўра пиёда юришнинг бир нечта афзалликларини кўриб чиқамиз.
Махсус спорт ускунаси сотиб олишнинг ҳожати йўқ
Пойида юришнинг ҳамёнингизга ҳам фойдаси бор — ушбу машғулот учун махсус ускуна харид қилиш шарт эмас. Асосийси, сизга қулай бўлган бир жуфт яхши кроссовка бўлса бас. Шу билан бирга, пиёда юриш танани фаол спорт каби зўриқтирмайди. Узоқ йўл юргандан сўнг танада ҳеч қандай ўзгариш бўлмагандек туюлиши мумкин, аммо натижа бир неча ҳафтада сезиларли бўлади ва ўзингизни тетикроқ ҳис эта бошлайсиз.
Организмнинг умумий тикланиши
Пиёда юриш томирлар қон оқимининг жадалроқ ҳаракат қилишига ёрдам беради, натижада барча органлар керакли миқдорда кислород билан тўйинади. Кечқурун юришни одатга айлантирган шахсларда тез орада умумий аҳволи яхшиланади: аввал бош оғриғи, маълум муддатдан кейин бўғимлардаги оғриқлар йўқолади. Чунки узоқ юриш натижасида қон айланиши қаттиқлашиб қолган мушакларни енгиллаштиришга ёрдам беради.
Яхши уйқу
Пиёда юриш уйқу сифатини яхшилашга кўмаклашади. Агар сиз уйқусизликдан азият чексангиз, кечқурунги сайр бундан халос этиши мумкин. Уйқуга кетишдан аввал тоза ҳаводан тўйиб нафас олиш, ҳатто оддий шаҳар паркида айланиш тана ўзини енгил ҳис қилиши ва бўшаши учун фойдалидир. Кислород билан тўйинган организм эса уйқу чақиради.
Спорт зали ҳақида унутиш мумкин
Мунтазам пиёда юриш ҳафтасига бир неча марталик спорт залидаги машғулотлар ўрнини босиши мумкин. Пиёда сайр қилиш — бу вазн ташлашнинг исботланган тури бўлиб, ҳар қандай ёшдаги инсонлар учун мос келади. Юриш югуриш каби самарали ҳамда соғлиқ учун анча хавфсизроқдир. Эрталабки машғулотлар сизни энергия билан тўлдиради, кечки машғулотлар эса иштаҳангизни жиловлайди. Асосийси, пиёда юриш машқини мунтазам бажариш керак.
Аъло кайфият
Юриш нафақат жисмоний, балки руҳий ҳолатингизга ҳам фойдалидир. Сайр қилиш бахт гормонлари — эндорфин ишлаб чиқаришни рағбатлантиради. Агар яқин инсонлар ва дўстлар билан бирга сайр қилсангиз, кайфиятингиз бир неча баробар ошганини ҳис қиласиз.
Мия фаолиятини яхшилаш
АҚШнинг кексайиш муаммолари бўйича миллий кенгаши мутахассислари кунига 40-45 дақиқа тез юриш 60 ёшдан ошган одамларда фикрлаш қобилиятини яхшилашини аниқлади, чунки бундай жисмоний фаоллик мияда қон айланишини яхшилайди. Ётишдан олдин сайр қилишни яхши кўрадиган ёшлар келажакда мия фаолияти билан боғлиқ муаммоларни шу тарзда олдини олишлари мумкин.
Умрни узайтириш
Кунига уч километрдан ортиқ масофани босиб ўтган шахсларда бевақт ўлим хавфи сезиларли даражада камайиши исботланган. Умрингизни узайтириш учун сиз мазали таом ва ичимликлардан воз кечишингиз билан бирга ҳар куни юришни одатга айлантиришингиз лозим.
Изоҳ (0)