Ўзбекистоннинг кўплаб ҳудудларида июль ойида ўртача ойлик ҳарорат ўртача кўп йиллик қийматларга яқин бўлиб, марказий вилоятларнинг қатор туманларида ва республиканинг жанубида меъёрдан 1-1,7 даражага юқори бўлди. Бу ҳақда “Ўзгидромет” хабар берди.
Маълум қилинишича, 2024 йили июль ойининг катта қисмида ҳарорат тартиби жуда қулай бўлди, бундай ҳолат Ўзбекистонда ёз фаслининг ўртаси учун хос эмас.
Республика ҳудудининг катта қисмида кундузги ҳаво ҳарорати 32-37 даража иссиқ атрофида бўлди. Фақат республика жанубида ва чўл ҳудудларида баъзи жойларда ҳаво кундуз кунлари 39-41 даражагача исиди.
Июль ойи учинчи ўн кунлигининг бошидан бошлаб иссиқ аста-секин кўтарила бошлади ва ўн кунликнинг ўрталарига келиб ҳароратнинг максимал қиймати 38-41 даражага, чўл ҳудудлари жанубида 42-44 даражага, Ўзбекистоннинг энг жанубий нуқтаси — Термиз шаҳрида эса 45-46 даражага етди. 25—28 июль кунлари иссиқ энг юқори чўққига кўтарилиши кузатилди. Ойнинг охирги кунларида ҳарорат бир оз пасайди.
Ўтган июль ойида Ўзбекистоннинг барча ҳудудларида максимал ҳаво ҳарорати ўзининг рекорд кўрсаткичлардан анча узоқ бўлди.
Максимал ҳарорат 40 даража ва ундан юқори бўлган кунлар сони 2024 йил июль ойида ҳудуднинг катта қисмида 1-3 кунни, чўл ҳудудларда 4-7 кунни ташкил этди. Максимал ҳарорат 40 даража ва ундан юқори бўлган энг кўп кунлар сони дашт ҳудудида (Муборак) — 11 кун ва энг чекка жанубда (Термиз) — 15 кун кузатилди.
Ўтган июль ойида максимал ҳаво ҳарорати 40 даража ва ўтган юқори бўлган кунлар сони сўнгги 10 йил ичида энг кам бўлди.
Изоҳ (0)