Британияда ўта ўнг кучлар томонидан уюштирилган мигрантларга қарши намойишлар мамлакат бўйлаб тартибсизликларга айлангани сабабли 90 дан ортиқ киши ҳибсга олинди.
Хабарга кўра, Халл, Ливерпуль, Бристол, Манчестер, Сток-он-Трент, Блекпул ва Белфастда йирик тартибсизликлар содир бўлган. Уларнинг иштирокчилари дўконларни вайрон қилиб, полиция ходимларига ҳужум қилган. Бироқ кичикроқ намойишлар пайтида ҳеч қандай зўравонлик кузатилмаган.
Бош вазир Кей Стармер полицияга нисбатан “нафрат уйғотмоқчи бўлган экстремистлар”га қарши курашда ҳукуматнинг тўлиқ ёрдамини ваъда берган.
Қиролликдаги тартибсизликлар сабаби
Бошланган тартибсизликлар сўнгги ўн йил ичида мамлакатда энг кенг тарқалган тартибсизликлардан биридир. Уларга мигрантлар оиласидан бўлган 17 ёшли ўсмир томонидан содир этилган жиноят сабаб бўлган. 29 июль куни у Саутпорт курорт шаҳрида 6 ёшдан 11 ёшгача бўлган болалар учун мўлжалланган рақс студиясига пичоқ билан ҳужум қилган.
Ҳужум оқибатида 3 қиз ҳалок бўлган, 8 нафар бола пичоқланган, улардан 5 нафарининг аҳволи оғир. Болаларга ёрдам беришга шошилган икки киши ҳам оғир жароҳатлар билан шифохонага жойлаштирилган. Ҳужум қилган шахс қўлга олинган ва унга нисбатан жиноий иш қўзғатилган.
30 июль куни Саутпортда ўнг қанот экстремистик намойишлар зўравонликка айланган. Натижада 39 нафар полициячи яраланган. Намойишчилар расмийларни жиноятчининг асл келиб чиқишини яширишда айблашган. Полиция бу маълумотни ёлғон деб атаб, гумонланувчи Аксел Рудакубана Буюк Британияда туғилгани ва қўшни Саутпортга қўшни Бенкс шаҳарчасида яшаганини таъкидлаган. Унинг ота-онаси руандалик бўлган.
Бир кун ўтиб Лондон марказида британиялик ўта миллатчиларнинг норозилик намойиши чоғида 100 дан ортиқ одам ҳибсга олинган. Фаоллар мамлакатга ноқонуний мигрантларнинг кириб келишини тўхтатишни талаб қилган. Намойиш полиция билан жанжалга айланиб, бир неча полициячи ва бир тиббиёт ходими енгил тан жароҳати олган. Британия ОАВлари хабар беришича, намойишчилар Даунинг-стритдаги бош вазир қароргоҳи ёнидаги панжара устидан шиша ва феерверк улоқтирган.
Изоҳ (0)