Андижон вилоятининг Хонобод шаҳрида 29—31 июль кунлари бўлиб ўтган “Дунё садолари” халқаро миллий эстрада санъати фестивалига барча манбалар ҳисобидан жами 6 миллиард сўм маблағ сарфланди. Бу ҳақда вилояти ҳокимлиги матбуот хизмати хабар берди.
Тадбирда Ўзбекистон ва дунё эстрадаси юлдузлари, хусусан, Озодбек Назарбеков, Юлдуз Усмонова, Райҳон Ғаниева, Ҳамдам Собиров, қозоғистонлик Jah Khalib, Jony, дунёга машҳур руминиялик хонанда Инна иштирок этди.
Ижтимоий тармоқларда ушбу фестивалга жаҳон юлдузлари ташриф буюриши кенг муҳокамаларга сабаб бўлганди. Шунингдек, журналистларнинг “Дунё садолари” фестивалига киритилмаётгани ҳақида хабарлар пайдо бўлганди. Муслимбек Иброҳимов буни рад этиб, барча журналист ва ОАВ вакиллар киритилишини ташкил қилганини маълум қилди.
Вилоят ҳокимлиги берган ахборотга кўра, ушбу халқаро тадбир аҳоли учун самарали томонлама йирик иқтисодий ўзгаришларни ҳам ясади. Қайд этилишича, фестивал давомида Хонобод шаҳрига маҳаллий ва хорижий ташриф буюрувчилар сони 2,5 баробарга (2 миллион нафар) ортди. Тадбиркорлик субъектларида тушум кескин ортди. Жумладан, 2024 йилнинг 7 ойи давомида тушум 48 миллиард сўмни ташкил қилган бўлиб, (шундан 29—31 июль кунлари 8,5 миллиард сўмга етган) ўтган йилнинг мос даврида нисбатан икки баробарга кўп.
“Бу кўрсаткичлар Хонобод шаҳридаги тадбиркорлик субъектлари ва аҳоли даромади ошганлигини кўрсатмоқда”, дейилади хабарда.
Шунингдек, маълум қилинишича, савдо ва хизмат кўрсатиш фаолияти билан шуғулланувчи тадбиркорлар сони ўтган 2023 йилда 48 тани ташкил этган бўлса. 2024 йилдаги халқаро тадбир давомида доимий фаолият олиб борувчи тадбиркорлик фаолиятлари сони 230 тага кўпайиб, қарийб беш баробарга ортди.
Меҳмонларга хизмат кўрсатувчи дала ҳовли ва уй меҳмонхоналаридаги ётоқ жойлар сони 1900 тани ташкил қилган бўлса 2024 йилда бу рақам 6 мингдан ортди. Айниқса, аҳоли даромадларини ошириш, иш билан таъминлаш ва кам даромадли фуқароларнинг даромадини оширишда “Сайхунобод”, “Уйчи” тажрибаси асосида 600 дан ортиқ хонадонларда уй-меҳмонхоналар ташкил этилди.
Фестивалдан “Дарё” тайёрлаган эксклюзив репортажни қуйидаги ҳавола орқали томоша қилиш мумкин.
Изоҳ (0)