Ўзбекистондан ўтган 6 ойда хорижда ишлаш истагида бўлган 64 минг нафар шахс чет давлатларга қонуний, хавфсиз ҳамда уюшган ҳолда ишга юборилгани маълум қилинди.
Хабар берилишича, бу ўтган йилнинг мос даврига нисбатан 3 бараварга кўп. Жорий йилнинг ўтган даврида хорижга вақтинча ишга юбориш бўйича ҳам салмоқли ишлар қилингани, мамлакатлар географияси ривожланган давлатлар ҳисобига кенгайгани таъкидланди.
Жорий йилнинг II ярим йиллигида 90 минг нафар шахсни Жанубий Корея, Германия, Буюк Британия, Япония, Руминия, Болгария, Венгрия, каби ривожланган давлатларда ишга жойлаштириш режалаштирилган.
Буларнинг барчаси “Хорижга иш — маҳалладан” тамойили асосида йўлга қўйилади.
Шунингдек, йил охиригача 115 минг ишсиз аҳоли касб-ҳунар, тадбиркорлик кўникмалари ва хорижий тилларга ўқитилади.
Камбағалликни қисқартириш ва бандлик вазирининг “Меҳнат мигрантларига субсидия, компенсация ажратиш тартиби тўғрисидаги низомни тасдиқлаш ҳақида”ги буйруғи лойиҳаси эълон қилинди. Ушбу низом президентнинг 2024 йил 4 апрелдаги “Меҳнат миграцияси жараёнларини такомиллаштириш ҳамда хорижда вақтинча меҳнат фаолиятини амалга ошираётган шахсларни қўллаб-қувватлашга доир қўшимча чора-тадбирлар тўғрисида”ги қарорига мувофиқ, вақтинчалик меҳнат фаолиятини амалга ошириш учун хорижга кетаётган, шунингдек, хорижда меҳнат фаолиятини амалга ошираётган Ўзбекистон фуқароларига субсидия, компенсация ажратиш тартибини белгилайди.
Изоҳ (0)