Москвада стратегик ракета кучларини бошқариш марказининг юқори мартабали офицери Андрей Торгашевнинг машинаси портлатиб юборилди. Бу ҳақда “Агентство” хабар берди.
Портлаш Москва шимолида, Синявинский кўчасида юз берган. Дастлаб, Toyota Land Cruiser автомобилида Торгашев ва яна бир киши бўлгани хабар қилинган. Кейинроқ Торгашевнинг рафиқаси портлаш вақтида эри жароҳатланмагани, машинада бошқа одам бўлганини айтган.
Россия ички ишлар вазирлиги расмий вакили Ирина Волк ҳодисага “белгиланмаган предмет”нинг портлаши сабаб бўлганини билдирган. “Коммерсант” маълумотларига кўра, бу тротил эквивалентида ярим кило қувватга эга бўлган портловчи қурилма эди. Тергов қўмитаси жиноят иши қўзғатилганини маълум қилган, аммо қайси моддага асосланганига аниқлик киритмаган.
“ТАСС”нинг ёзишича, иш қотилликка уриниш моддаси бўйича қўзғатилган. “РИА Новости” ҳуқуқ-тартибот идораларига таяниб, портлашнинг версияларидан бири касбий фаолият эканини ёзмоқда. Россия оммавий ахборот воситалари машинага портловчи қурилма ўрнатилгани акс этган видеоларни тарқатмоқда.
Украина президенти офиси раҳбари маслаҳатчиси Михаил Подоляк Киевнинг мазкур портлашга алоқаси йўқлигини айтган:
“Тушунишимча, у ерда (машинада) носоз ускуналар бўлган. Албатта, бизнинг бунга ҳеч қандай алоқамиз йўқ”, деган у.
“Московский Комсомолец” нашрининг ёзишича, Торгашов бир неча йил аввал махфий ҳарбий қисмлардан бирида хизмат қилган, бир муддат Новосибирск ва Калининградда яшаган. Шундан кейин Москвага кўчиб келган.
Изоҳ (0)