Эфиопия жанубида 22 июль куни юз берган ер кўчкиси оқибатида камида 50 киши ҳалок бўлган. Бу ҳақда Reuters нашри хабар берди.
Манбада айтилишича, бахтсиз ҳодиса Эфиопия жанубидаги Гофа туманида рўй берган. Кучли ёмғир ёғиши ортидан тоғли ҳудудда кўплаб кўчкилар кузатилган.
Қутқарув гуруҳлари ҳозирга қадар 50 кишининг жасадини лой орасидан олиб чиқишган. Жасадларни қидириш яна давом эттирилаётгани билдирилган. Ноқулай об-ҳаво шароити туфайли қутқарув операциясини давом эттиришда қийинчиликлар юзага келмоқда.
“Кеча тунда кучли ёмғир ёғди ва кўчки оқибатида бир қанча фуқаролар ҳалок бўлди. Уларни ҳали ҳам қидиряпмиз. Ҳалок бўлганлар кўп бўлиши мумкин”, деган Гофа тумани ҳукумати вакили Кассаҳун Абайне.
Хабарда айтилишича, қурбонлар орасида аёллар, болалар ва маҳаллий полициячилар ҳам бор. Ҳалокат юз берган Жанубий Эфиопия вилоятида фавқулодда ҳолат эълон қилинган. Кучли ёғингарчилик сабаб кўчкилар қайталаниши мумкинлиги эълон қилинган.
Эфиопия иқлимни кузатиш агентлиги яқин ҳафталарда ёғингарчилик кучайиши ва дарёлар сатҳи ошишини прогноз қилган. Бу эса мамлакат жанубидаги вилоятлар учун огоҳлантириш сигнали бериши айтилган.
Изоҳ (0)