НАТО матбуот котиби Фараҳ Даҳлалла альянснинг айни пайтда 500 мингдан ортиқ ҳарбий хизматчиси юқори шай ҳолатда эканини айтди. Бу ҳақда у CNN’га хабар берди.
Юқори даражадаги шай ҳолат шуни англатадики, ҳарбийлар 30 кун ичида саф тортиши мумкин. 2022 йилда альянсда 20 минг нафар ҳарбий юқори жанговар шай ҳолатда бўлган. 2023 йилнинг ёзида уларнинг сонини 300 мингтага етказишга қарор қилинган ва бир йилдан сўнг НАТО бу мақсадга эришилганини айтган.
Даҳлалланинг сўзларига кўра, ҳарбий хизматчиларни ёллаш ва тайёрлаш усули ҳар бир мамлакат ихтиёрида қолади, аммо альянс давлатларининг тахминан учдан бир қисми у ёки бу шаклдаги мажбурий ҳарбий хизматга эга. Украинадаги уруш фонида НАТО энг катта мудофаа режаларини амалга оширди.
Шу билан бирга, ҳарбий таҳлилчилар Европа давлатлари ҳарбийлар тақчиллигини бошдан кечираётгани, НАТО Россия билан уруш эҳтимолида фронтга етарлича аскар юбора олмаслигини айтмоқда.
“НАТОнинг Европа иттифоқчилари қоғозда Россияга қарши туришда етарли бўлган 1,9 миллион ҳарбий хизматчига эга. Бироқ аслида бу альянсга 300 мингдан ортиқ ҳарбийни эҳтимолий ҳарбий можарога жалб этиш қийин бўлади”, дейди улар.
Шу билан бирга, экспертларнинг таъкидлашича, бундай миқдордаги одамларни сафарбар этишга ойлар керак бўлади.
Изоҳ (0)