Ўзбекистонда жорий йилнинг сўнгги олти ойида туғилишлар ҳақида маълумот берилди.
Давлат хизматлари агентлигига кўра, мазкур даврда 10 650 та эгизаклар туғилган. Улардан энг кўпи Фарғона вилоятида, энг ками эса Сирдарёда қайд этилган. Туғилишлар бўйича эса Самарқанд 50 215 нафар чақалоқ билан етакчилик қилмоқда. Энг кам туғилиш Сирдарёда қайд этилган.
Сўнгги 6 ойда ФҲДЁ органлари томонидан республика бўйича 97 409 та никоҳ қайд этилган бўлиб, шундан 34 704 та ёки 36 фоиз аёл эрининг фамилиясига ўтган. Ўртача никоҳ ёши 24 ёшни ташкил қилган.
Мазкур вақт давомида 20 ёшгача фарзандли бўлган оталар 4 816 нафарни, оналар 131 217 нафарни ташкил қилган. Бир йилгача бўлган никоҳ даврида расмийлаштирилган ажримлар сони 1050 та бўлиб, энг кўп Тошкент шаҳрида кузатилган.
Шунингдек:
- 2 309 нафар эркаклар 50 ёшдан кейин;
- 412 нафар эркаклар 60 ёшдан кейин;
- 34 нафар эркаклар 70 ёшдан кейин яна бир бор ота бўлган.
Аҳолининг ўртача ёши
Сўнги 20 йил ичида Ўзбекистон аҳолисининг ўртача ёши кўтарилиб бормоқда. Хусусан, жорий йил бошида (1 январь) мамлакат аҳолисининг ўртача ёши эркакларда 28,5 ёшни, аёлларда 30 ёшни ташкил этган. Ўн йил илгари (2014 йилда) эркакларнинг ўртача ёши 27,3 ёш, аёлларники 28,6 ёш бўлган. 2004 йилда эса эркакларда 24,8 ёш ўртача, аёлларда 26,1 ёш ўртача ёш чегараси ҳисобланган.
Республикада 2023 йилда аҳолининг туғилишда кутилаётган умр давомийлиги 74,7 ёшни ташкил этган. Бу кўрсаткич туғилган (0 ёшдаги) инсонларнинг кутилаётган ўртача умр кўриш йиллари қанчалигини англатади.
Мамлакатда январь–март ойларида 205 700 чақалоқ (2023 йил мос давридан 4,3 фоиз кам) тирик туғилган. Энг кўп туғилиш Самарқанд вилоятида (24 075 нафар), энг ками эса Сирдарё вилоятида (5 066 нафар) қайд этилган. Ҳудудлар бўйича туғилиш коэффициенти энг юқори кўрсаткич Сурхондарёда, энг кам ўсиш Бухорода кузатилган.
Изоҳ (0)