Тошкент шаҳрида ноқонуний ўрнатилган ташқи реклама ва ахборот объектлари (конструкциялари) мажбурий тартибда демонтаж қилинади. Пойтахт ҳокимининг бу борадаги тегишли қарори қабул қилинди.
Қарорда қайд этилишича, 2024 йилнинг 1 июнига қадар бундай объектларни қонунийлаштириш имконияти берилган.
Демонтаж ишлари ҳокимликнинг Рақамли ривожланиш департаменти ҳисобидан амалга оширилади. Миллий гвардия демонтаж вақти жамоат хавфсизлигини таъминлайди.
Пойтахтда ноқонуний ўрнатилган ташқи реклама ва ахборот объектларини демонтаж қилиш ишлари 2024 йил 31 декабрга қадар якунланади. “Тошкент шаҳар электр тармоқлари” МЧЖ демонтаж қилиниши керак бўлган ташқи реклама ва ахборот объектларини мажбурий тартибда электр тармоғидан узиш чораларини кўради.
Эслатиб ўтамиз, Тошкент шаҳрида реклама конструкцияларини оммавий бузиб ташлаш ишлари 2021 йил 8 апрелдан бошлаган эди. Ташқи реклама объектларининг эгалари конструкциялар қонун бўйича ўрнатилгани, “снос” бўйича кўрсатма “юқоридан” бўлганини маълум қилган. Ўшанда тадбиркорлар ҳукуматнинг ҳаракатини ноқонуний деб айтган, чунки баннерлар суд қарорисиз бузиб ташланган.
Реклама соҳасидаги тадбиркорлар ҳатто ушбу вазиятни ҳал этишга чақирувчи бир нечта реклама баннерлари ўрнатиш орқали реклама конструкцияларининг ноқонуний бузилишини тўхтатишни сўраб президент Шавкат Мирзиёевга мурожаат йўллаган. Монополияга қарши курашиш қўмитаси пойтахтдаги реклама конструкцияларнинг ярми талабга жавоб бермаслигини билдириб, томонларни қонунчиликка риоя қилишга чақирганди.
Изоҳ (0)