Сингапур соҳиллари яқинида икки йирик нефть танкери тўқнашиб, ёниб кетди

Сингапур қирғоқлари яқинида 19 июль куни икки йирик нефть танкери тўқнашиб, ёниб кетган. Бу ҳақда Reuters нашри хабар берди.

Манбада айтилишича, Сингапур байроғи остидаги Hafnia Nile танкери ва San-Tome ва Prinsipi компанияларига қарашли Ceres I нефть ташувчиси Сингапурнинг Педра Бранка оролидан тахминан 55 километр шимоли-шарқда тўқнашиб кетган. Тор бўғозда кемалар ҳаракати фаоллашиб кетгани, тезлик ва туман инобатга олинмагани оқибатида ҳалокат келиб чиққан.

Ҳалокатнинг Сингапур ёнилғи қуйиш порти яқинида рўй бериши минтақа бўйича хавотирларни кучайтирган. Чунки бўғозга нефть тўкилиши халқаро сув йўли ёпилишига олиб келиши мумкин.

Тўқнашув оқибатида 2 нафар денгизчи жиддий даражада жароҳатланган ва касалхонага олиб кетилган. Қолган экипаж аъзолари эса тезда қутқарилиб, хавфсиз ҳудудга етказилган.

Тўқнашув юз берган пайтда Hafnia Nile кемаси бортида 22 киши ва Ceres I кемасида 40 нафар экипаж аъзоси бўлган. Икки танкер 19 июль куни тонгги 6:15 да тўқнашиб кетган. Воқеадан кўп ўтмай ҳудудда патруллик қилаётган Сингапур ва Индонезия патрул кемалари ҳалокат сигнали тарқатган.

Сингапур ҳарбий-денгиз кучлари томонидан эълон қилинган фотосуратларда битта танкердан қуюқ қора тутун чиқаётгани, кема экипажи қутқарилиб, касалхонага олиб кетилгани акс этган. Қўшни Малайзиянинг атроф-муҳитни муҳофаза қилиш идоралари нефть океанга тўкилиши ҳолатларида кейинги чора-тадбирларга тайёргарлик ҳақида огоҳлантириш эълон қилган.

Маълумотларга кўра, Panamax компанияси томонидан ишлаб чиқарилган Hafnia Nile танкери тахминан 300 000 баррель нефтни олиб кетаётган бўлган. Ceres I кемасида олиб кетилаётган ёнилғи ҳажми эса ҳозирча аниқланмаган.

АҚШдаги Lloydʼs List  разведка бошқармаси бош таҳлилчиси Мишель Букман ҳалокатга учраган кемалар Эрон нефтини транзит қилишда фойдаланилганини маълум қилган. Сўнгги бир ойда Ceres I кемаси Сингапур бўғозида камида 3 марта транзит амалга оширган.

Ceres I бир неча бор АҚШ санкцияларини бузган ҳолда Эрон нефтини ташиш ёки жўнатишда иштирок этиб келган, деган Мишель Букман.

Бир қатор расмийлар кемалар ҳалокати уюштирилганини тахмин қилган. Бироқ буни исботловчи далиллар топилмаган. Танкерларни бошқарувчи муассаса ҳам ОАВ сўровларига жавоб бермаган.