Британиялик хонанда Адель узоқ муддатга фаолиятини тўхтатишга қарор қилди

Британиялик хонанда Адель жорий йилги турне дастурини якунлагандан сўнг, карьерасидан узоқ вақтга танаффус қилишни режалаштираётганини айтди.

Германийнинг Мюнхен шаҳрида бўлиб ўтадиган 10 кунлик концерт дастуридан аввал маҳаллий ОАВга берган интервьюсида “Мен бутунлай ҳолдан тойганман”, деди юлдуз.

“Мусиқа соҳасида янгиликлар қилиш бўйича ҳеч қандай режаларим йўқ. Барча гастрол концертларим тугагач, катта танаффус қилмоқчиман. Ҳеч бўлмаганда бир муддат бошқа ижодий ишлар билан шуғулланиш ниятидаман”, деди Адель.

“Биласизми, мен ҳатто уйда ҳам қўшиқ айтмай қўйдим. Ғалати, шундай эмасми?”, дея тан олди хонанда.

Аделнинг сўнгги альбоми 2021 йилда чиққан. Икки йил давомида у Лас Вегасда дам олиш кунларида концерт ўтказиб келмоқда ва яқинда Caesars Palace кўнгилочар марказида ўзининг 90-сонли шоусини ўтказди. Дастур ноябрь ойида тугайди ва Аделнинг айтишича, бундай узоқ муддатли гастроллар хонандани ҳар томонлама чарчатган.

“Жуда асабий бўлиб қолганман”

Июнь ойида Адель концертларидан бирида “Pride sucks” (контекстда “Гей парадлари ёмон” деб талқин қилиш мумкин) деб бақирган томошабинни жаҳл билан ҳақоратлади.

“Сиз менинг концертимга фақат шу сўзларни айтгани келдингизми?” дея Адель томошабинларга юзланди.

Маълумки, хонанда LGBТ ҳамжамиятини фаол қўллаб-қувватлайдиган юлдузлардан биридир.

“Агар айтадиган яхши сўзингиз бўлмаса, жим туринг, тушундингизми?” деди у ва шоуни давом эттирди.

Воқеа гувоҳи бўлган айрим томошабинлар сўзларига кўра, оломон орасидан бир киши унинг банд бўлган иш тартиби ҳақидаги аввалги изоҳларига жавобан “Work sucks”, яъни “Иш ёмон” дея ҳайқирган.

Журналистлар ушбу воқеа ҳақида хонандани сўроққа тутганда, Адель ўз жаҳлини тийишда жуда қийналишини тан олди:

“Жуда кўп нарса менинг асабимни бузади”, деди у ZDF нашрига. “Мен 36 га кирдим, қариб қолдим. Қолаверса, ўта жанжалкаш аёлга айландим”, дея қўшимча қилди юлдуз.

Унинг Германиядаги концертлари Лас Вегасдаги шоуларидан бутунлай фарқ қилади. Ушбу концерт учун ажратилган майдон 4 мингга яқин томошабинни ўзига сиғдиради. Шунингдек, тадбир ўтказиладиган жойда “Адель парки” ташкил этилади.

Аделнинг айтишича, у мусиқадан танаффус қилишни исташининг сабабларидан бири бу доимий диққат марказида бўлишнинг қийинлигидир.

“Машҳур бўлгунимга қадар ўтган ҳаёт тарзимни соғиндим. Айниқса, мени ҳеч ким танимаган пайтларни. Тўғри, эндиликда мен севган ишим — мусиқа билан истаган вақтим шуғуллана оламан ва қўшиқларим кўплаб инсонларга манзур бўлмоқда. Аммо машҳурликни ёмон кўраман”, деди Адель.