Ижтимоий тармоқларда Избоскан тумани ҳокимлигига тегишли бўлган хизмат машинасида милтилловчи чироқ мосламаси ўрнатилгани акс этган видеолавҳа тарқалди. Вилоят ҳокимлиги ҳолатга изоҳ берди.
Унга кўра, ушбу вазият тегишли тартибда яқиндан ўрганилмоқда. Ҳозирдаги аниқ маълумотларга кўра, ушбу тасвир автомобилларга безаклаш хизмати кўрсатувчи тадбиркорлик субъекти ҳудудида, автомашинани созлаш жараёнларида олинган.
Хизмат машинаси ҳайдовчиси бу қурилмани ўрнатиш учун тармоқ орқали тасвирли кўриниш юбориб, маъсул шахсдан бу учун рухсат сўраган ва дарҳол уни олиб ташлаш ҳақида кўрсатма олган. Шу вақтнинг ўзида синов тариқасида ўрнатилган чироқлар қайтариб чиқарилган.
Кейинроқ эса, олинган ана шу лавҳани хизмат кўрсатувчи субъект эгалари реклама сифатида ўз дўконларининг ижтимоий тармоқдаги саҳифаларига жойлаган. Бу эса, жамоатчилик муҳокамасига сабаб бўлмоқда.
Айни вақтда ҳайдовчига тегишли тартибда огоҳлантириш берилди. Шунингдек, хизмат кўрсатишнинг белгиланган тартиблари, реклама қоидалари бўйича тадбиркорга қўшимча тушунтириш ишлари олиб борилмоқда.
Изоҳ (0)