Самарқанд ва Фарғонада кредит маблағларини ўзлаштирганлар ушланди 

Самарқанд ва Фарғона вилоятларида кредит маблағларини ўзлаштириш ҳолатлари аниқланди, деб хабар бермоқда Прокуратура департаменти. 

Унга кўра, Бош прокуратура ҳузуридаги департаментнинг Ургут туман бўлими томонидан терговга қадар текширув ўтказилган. “Б.Б.” фермер хўжалиги раҳбари Б.Б. мустақил баҳоловчи “Э.Б.” МЧЖ масъул шахслари ва бошқалар билан ўзаро тил бириктириб, ҳудудий тижорат банки филиали билан томчилатиб суғориш ускуналарини сотиб олиш учун кредит шартномаси тузиб, кредит таъминоти сифатида тақдим этилган мулкларнинг бозор қийматини сунъий ошириб кўрсатган ва 450 млн сўм кредит маблағини қўлга киритган.

Шу каби, департаментнинг Фарғона вилоят бошқармаси томонидан ўтказилган терговга қадар текширувда фуқаро Ш.С. 2 дона Equinox харид қилиш учун ҳудудий тижорат банки филиалидан ота-онасининг номига 660,7 млн сўмлик кредит шартномалари расмийлаштиришга эришиб, автомашиналарни кредит таъминоти сифатида гаровга қўймасдан бошқа шахсларга 67 000 АҚШ долларига сотиб юборгани аниқланган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.